Ukiuni arlalinni toqqortaatigineqareersullu: Kommuni katersugaasivimmik illoqarfimmi allami ammaaqqissasoq

Ivittuuni Piiaaffik Atortussiassallu Pillugit Katersugaasiviup katersugaatai 2014-imiilli containerini toqqortarineqarsimapput, maannali siunertaminnut atorneqaqqilersussanngorlutik innuttaasunullu saqqummersinneqaqqillutik.

Taama pisoqarpoq Ivittuuni Piiaaffik Atortussiallu Pillugit Katersugaasiviup Paamiuni ammaqqinneqarnissaanik Kommuneqarfik Sermersooq aalajangersimammat.

Kommuni nittartakkamini taama allappoq.

Katersugaasivik matuneqarnissami tungaanut Ivittuuneeqqaarsimagaluarpoq, aaqqiissutissatullu periarfissat arlallit kommunimi politikerinut ukiut ingerlaneranni saqqummiunneqartarsimallutik.

Maannalu aalajangerneqarsimalerpoq katersugaasivik Paamiuni KGH-p illuutigisimasani B-56-imi toqqorsivittut peqqumaasivittullu atuuttumi ammaqqinneqassasoq.

Alapernaannermik pilersitsissasoq

Katersugaasiviulli takuniaasunut ammarneqannginnerani illu annikinnerumaamik iluarsaanneqaqqaassaaq.

Katersugaasivik takorianik soqutiginnilersitseqataassaaq, Paamiunut aqqusaarnissaq pilerinarnerulersillugu. Tamatuma saniatigut meeqqanut sammititamik immikkoortortaqassaaq, Paamiuni atuartut ornigullutik meeqqanullu paasinartumik paasissutissiivigineqarfigisinnaasaannik, kommuni allappoq.

- Inuit aatsitassat pillugit katersugaasivimmik soqutiginnilersinnissaat ajornakusuussasoq ilisimalluinnarparput. Taamaattumik saqqummersitsinissaq ilusilersorlugu aallartereerparput, inunnit aatsitassat assigiinngitsut qanoq inuiaqatigiinnut pingaaruteqarsimanerat sulilu pingaaruteqarnerat paasitikkusullugu.

- Kalaallit Nunaanni aatsitassat pillugit oqaluttuarisaanermut tunngatillugu inuit alapernaasilernissaat anguniagarivarput. Alapernaaserneq, atuarfinni atuaqatigiinnut apuunneqassasoq, aatsitassat suliassaqarfinnut assigiinngitsunut tunngassuteqarmata, kissaatigaara, Vinni Birkedal oqarpoq.