Ukiuni qulini ilaasortaatitaqanngereerlutik: Demokraatit Kujallermi ilaasortaatitaqalerput
Demokraatit Kommune Kujallermi kommunalbestyrelsemi ilaasortaatitaqalerpoq - kommunimut qinersinermit ukiut marlunngulertullu. Margrethe Thaarup Andersen Siumumiit ilaasortaajunnaarluni Demokraatini ilaasortanngorpoq.
Kommune Kujallermi kommunalbestyrelsemi ataatsimiinnermi tullermi Demokraatit issiasuutitaqarlutik ataatsimeeqataasussanngorput.
Margrethe Thaarup Andersen Siumumi ilaasortaajunnaarluni Demokraatini ilaasortanngorpoq. Partii Kommune Kujallermi 2008-2013-imili ilaasortaatitaqarani, maanna ilaasortaatitaqaqqilerpoq.
- Ineriartortitsinissaq aallukkusuppara, inuillu nammineq aalajangiisinnaassuseqarnissaat aamma soqutigalugu. Inuussutissarsiornerup siuariartornissaa, ilinniarsimassutsillu qaffasinnerulernissaa aamma sulissutigaakka. Tamakku tamarmik Demokraatit naleqartitaannut tarrarsortuupput, taamaattumillu taakkununnga ilaasortanngorpunga, Margrethe Thaarup Andersen partiimut allamut nuunnini pillugu nassuiaavoq.
Demokraatit Kommune Kujallermi kommunimut qineqqusaarnermi kingullermi qineqqusaartitaqanngikkaluarput.
Tunuliaqutaq anguniakkamik sukataaruteqartartoq
Margrethe Thaarup Andersen qinigaaffiup qiteqqunnerani politikkikkut inissisimanini nalilersorsimavaa, nalilersimallugulu Demokraatini ilaasortaassaguni tamanna pitsaanerussasoq.
- Demokraatit naleqartitai uanga aamma naleqartitaraakka, taannaannaanngilarli. Partii nukittuumik tunuliaqutaqarpoq sullarissunillu politikereqarluni. Kommunalbestyrelsemi parteeqateqarnanga issiagaluarumaluunniit, qularinngilara tunuliaquttannit ikorfartorneqarluassallunga, Margrethe Thaarup Andersen oqarpoq.
Taassuma erseqqissarpaa politikkikkut anguniakkanik ataatsimut sammiveqarluni suliniarneq kommunalbestyrelsemi sulinermini amigaatigisimallugu.
Siumut tunuliaqutaralugu kommunalbestyrelsemi ilaasortaanermini Margrethe Thaarup Andersen aningaasaqarnermut inuussutissarsiornermullu ataatsimiititaliami, kiisalu ulluunerani paaqqinnittarfinnut, ilinniartitaanermut, sulisoqarnermut, kulturimut sunngiffimmilu sammisaqartitsinermut ataatsimiititaliami ilaasortaasimavoq. Ataatsimiititaliani ilaasortaaffiit pillugit kommunalbestyrelse aprilimi ataatsimeeqqileruni naliliissaaq.
Demokraatit immikkoortortaqarfiliulerput
Demokraatini siulersuisuunerit aalajangerput kujataani Qaqortumi immikkoortortaliussallutik. Inatsisartuni ilaasortaq, aamma Demokraatini aaqqissuussaanikkut siulittaasup tullia, Nivi Olsen sapaatip akunnerata tulliani Qaqortumukassaaq immikkoortortamik aallartitsisoqarnissaanut suleqataajartorluni.
- Siulersuisuunerni nuannaarutigaarput siuariartornerput tatigineqarnittalu annertusiartornerat. Tamanna ilaasortat amerliartornerannik takutitsivoq. Nuannerpoq, Demokraatini aaqqissuussaanikkut siulittaasup tullia Nivi Olsen Sermitsiaq.AG-mut oqarpoq.
Qaqortumi immikkoortortaqalernissap pisariaqarnera Margrethe Thaarup Andersenip aamma ilalerpaa:
- Partiimut nuunninniit arlalippassuit saaffiginnipput. Suliagut politikkerpullu soqutigineqarluarpoq, kaammattuuterpassuarnillu tusartinneqarpunga. Demokraatit Kujallermi politikkikkut suleqataanissaat pisariaqartinneqartoq, tamassumani takusinnaavarput, oqarpoq.
Qaqortumi immikkoortortaqarfeqalernissaq pillugu ulloq suna ataatsimiittoqassanersoq suli inissinngilaq.