Ukiut marluk ingerlaneranni politiit pillugit naammagittaalliuutit 15-it
Politiit pillugit naammagittaalliuuteqartarfiup piffissami pineqartumi politiit marluk pinngitsaaliillutik atoqateqarsimanerat pillugu naammagittaalliuut kiisalu tigusarinninnermi 'tarnikkut naalliutsitsineq' pillugu naammagittaalliuut suliarisimavaat.
![Ukiut marluk ingerlaneranni politiit pillugit naammagittaalliuutit 15-it](https://image.sermitsiaq.ag/112885.webp?imageId=112885&width=960&height=542&format=jpg)
Politiit pillugit naammagittaalliuutigineqarsimasut 2019-imi qulingiluaapput 2020-milu arfiniliullutik. Taakkua saniatigut politiini sulisut pinerluuteqarsimanerannik suliat katillutik sisamaapput aamma inunnut politiit suliaqarneranni imaluunniit politiinit nakkutigineqarnerminni toqukkut qimagussimasunut imaluunniit ajoqusingaatsiarsimasunut tunngatillugit misissuisimaneq ataasiulluni.
Kalaallit Nunaanni Politiit pillugit Naammagittaalliuuteqartarfiup nassuiaataani, ukiut marluk ingerlaneranni naammgittaalliuutigineqarsimasut pillugit nalilersuiffiusimasumi tamanna atuarneqarsinnaavoq.
Kisitsisit atorlugit nassuiaammi takuneqarsinnaanngilaq, suliani assigiinngitsuni naammagittaalliuutigineqarsimasut sumorpiaq tunngassuteqarnersut. Takuneqarsinnaavorli 2020-mi politiini sulisut pissusilersuutaat pillugit naammagittaalliuutit arfiniliusut aamma politiini sulisut pinerluuteqarsimanerannik suliat pillugit marluk suliarineqarsimasut.
Naamamgittaalliuuteqartarfimmi suliat aalajangiiffigineqarsimasut tallimaallutillu arfineq-marluupput, tamanna tabelimi tulliuttumi takuneqarsinnaavoq, tassani pissusilersuutigineqarsimasut naammagittaalliuutini amerlanersaasuni aalajangiiffigineqarsimasut takuneqarsinnaapput:
![Ukiut marluk ingerlaneranni politiit pillugit naammagittaalliuutit 15-it](https://image.sermitsiaq.ag/619948.webp?imageId=619948&width=960&height=500&format=jpg)
Politiit pillugit Naammagittaalliuuteqartarfiup suliat, 2019-imi 2020-milu naammagittaalliuuteqartarfiup suliarinerusimasai nassuiaammi saqqummiussimavai.
Tarnikkut naalliutsinneqarsimasutut misigisimasoq
Naammagittaalliuuteqartarfiup pissusilersuutit pillugit naammagittaalliuutinut tunngatillugu suliami ataatsimi assersuutigalugu oqaatigaa, tigusarineqarsimasup ataatsip politiit suliamik isumaqatiginninniarneranni isertitsivimmiitinneqarsimanera. Naammagittaalliuuteqartup tassunga atatillugu oqaatigisimavaa, politiit isertitsivianniinnermini, politiit isertitsiviup qulaani uteqattaarlutik tukkartortarsimanermikkut ”tarnimigut naalliutsittarsimagaanni”, illersuisuminullu marloriarluni sianerusuttarsimagaluarnini itigartinneqartarsimasoq.
Naammagittaalliuuteqartorli ilalerneqarsimanngitsoq, nassuiaammi atuarneqarsinnaavoq:
- Kalaallit Nunaanni Politimesteri aalajangersimavoq suliap misissorneqarnera unitsinneqassasoq, misissuinermi paasissutissanik naammagittaalliuummut tapersiisinnaasunik pissarsisoqarsinnaasimanngimmat. Politiit pillugit Naammagittaalliuuteqartarfik politimesterip aalajangiineranut isumaqatigisimavoq.
Arnaq: Isertitsivimmiinninni pinngitsaalillunga atoqatigineqarpunga
Pissusilersuutit pillugit suliat saniatigut aamma politiit pinerluuteqarsimasut pillugit suliaqartoqarsimavoq. Naammagittaalliuuteqartarfiup tassani arnap ataatsip politiit marluk ilungersunartumik pisimasutut naammagittaalliuutigisimavai.
Arnap pineqartup 2017-imi politiit angutit marluk isertitsivimmi pinngitsaalilluni atoqatigisimagaanni nalunaarutigisimavaa.
Nalunaaruteqarmat politimesterip suliami erseqqissumik misissuisoqarnissaa aallartissimavaa. Misissuineq politiit marluk pineqartut unnerluutigineqannginnerannik inerneqarsimavoq:
- Politimesterip immikkut pingaartissimavaa, misissuinermi A-p (arnap naammagittaalliuuteqartup) nassuiaataanut akerliusunik arlalinnik paasissutissanik pissarsisoqarsimanera, tassa naammagittaalliuutaanut tapersiisinnaasumik teknikkikkut paasissutissanik, soorlu video atorlugu immiussanik imaluunniit nakorsat paasissutissaataannik saqqummiussisoqarsinnaasimanngimmat. Politiit pillugit Naammagittaalliuuteqartarfiup politimesterip aalajangiinera isumaqatigisimavaa, naammagittaalliuuteqartarfik suliaq pillugu allappoq.
Motorcykelinik atuisimaneq pillugu naammagittaalliuut
Naammagittaalliuuteqartarfiup aamma suliaq ataaseq isummerfigisimavaa, tassani innuttaasup ataatsip politiit Danmarkimi politiinit motorcykelinik attartorsimanerannut atatillugu Kalaallit Nunaanni Politiit politiinut unnerluutigisimavai.
Motorcykerlit naalagaaffimmit tikeraartoqarneranut atatillugu atorneqartussaasimapput ullualuinnarnilu nunami maaniittussaasimallutik, unnerluutiginnittoq isumaqarsimavoq politiit inatsit Kalaallit Nunaannut motorcykelinik eqqussinissamut sanaartornissamullu inerteqqutaasoq unioqqutissimagaat.
Politiit suliaq naalagaaffiup eqqartuussissuserisuanut suliassanngortissimavaat. Naalagaaffiup eqqartuussissuserisuata suliamik misissuisoqarnera unitsissimavaa, naalagaaffiup eqqartuussissuserisuata pinerluuteqartoqarsimanngitsoq nalilersimagamiuk.
- Naalagaaffiup eqqartuussissuserisuata tassunga atatillugu oqaatigisimavaa, Kalaallit Nunaanni Politiit naalagaaffimmit tikeraartoqarneranut atatillugu motorcykelinik ikittunnguanik piffissami sivikitsumi attartorsimanerat, Kalaallit Nunaannut motorcykelinik eqqussinissamut sanaartornissamullu inerteqquteqarneq pillugu inatsit unioqqutinneqarsimanngitsoq, nassuiaammi allassimavoq.