Ukiut qulit ingerlaneranni umimmaat 19-it qassinngorsimappat?
Kommune Kujalleq Nanortallip eqqaani umimmannik kisitsiniarpoq piniartoqarsinnaanersoq paasiniarlugu.
Ukiut qulit matuma siorna Ivittuunit Nanortallip kangiani qeqertamut umimmannik 19-inik nuussisoqarpoq, maannalu umimmannik kisitsisoqartariaqartoq najukkami piniartut isumaqarput.
Immaqa ima amerlatigilersimapput allaat piniarneqarsinnaanngorlutik.
Najukkami piniartut naapertorlugit 150-it pallillugit amerlassuseqarsimasinnaapput, piniartoqarsinnaalissappallu taama amerlatiginissaat taamanikkut piumasaqaataavoq.
Kommune Kujallermi kommunalbestyrelsip ataatsimiinnerani ukiup sapaatip-akunnerata qulingiluaani umimmannik kisitsinissamut politikkerit aningaasaliissuteqarnissaat ingerlatsiviup qinnuigissavai.
Qaqortumi Nanortalimmilu piniartut Pinngortitaleriffimmilu ilisimatuut nunami miluumasunik immikkut ilisimasallit suleqatigalugit kisitsisoqassaaq, kommunalbestyrelsip februaarip 14-iani ataatsimiinnissaanut saqqummiussami tamanna atuarneqarsinnaavoq.
Umimmannik kisitsinermut 160.000 koruunit missaat atorniarlugit kommunip naatsorsuutigaa.