Ukunani sukkavallaamik biilertoqartarpoq
Illoqarfimmi sumiiffiit sisamat sukkavallaamik biilerluni ingerlaarfiusarput, sumiffinnilu taakkunani sukkassusissamut killigititaq qaangerneqakkajuppoq.
Aqqusinerni Suloraq Qinngorpumiittumi aamma Aqqusinersuaq talittarfiup eqqaaniittumi biilertut sukkavallaamik ingerlasarput. Biilerluni ingerlaarnermi sukkassusissatut killigititaq 40 km/timeuvoq, aasaq mannali uuttuinerit takutippaat agguaqatigiissillugu sukkassuseq 56 km/timeusoq. Tassa sukkassusissamut killigititaq 16 km/timemik qaangerlugu.
Ernumanarsinnaasut ilagaat Kongevejen, Katuap eqqaatigut pisuinnaat ikaarfigisartagaannik aqqusaarsisoq. Aqqummi tassani sukkanerpaamik 30 km/timemik ingerlaartoqarsinnaasoq, agguaqatigiissillugu 9 km/timemik sukkanerusumik ingerlaartoqartarpoq.
Kingaallassaatit eqqarsaatigineqarput
- Soorunami ernumanartutut isigivagut. Biilerlutik angalaartut assigiinngitsutigut kingaallatsissinnaavagut, soorlu aqqusinermi kingaallassaatit atorlugit, Kommuneqarfik Sermersuumi planchef, Bilo Høegh Stigsen oqaluttuarpoq.
Kongevejen immikkut ukkatarineqarpoq, inuit aqqusinikkut ikaartartut eqqarsaatigalugit.
Politiit akulerutsissavisigit?
- Aap, pissusissamisoorpoq uuttuinigut pillugit politiit ilisimatissallugit, planchef ilisimatitsivoq.
Sukkassusissap killiganik ukunani qaangiisoqarnerusarpoq:
- Suloraq aamma Aqqusinersuaq: Agguaqatigiissillugu 56 km/t, killissarititaq 40 km/t-iusoq
- Pisisseq: Agguaqatigiissillugu 51 km/t, killissarititaq 40 km/t-iusoq
- Kongevej Nord: Agguaqatigiissillugu 39 km/t, killissarititaq 30 km/t-iusoq
- Borg.Anniitap Aqqusernga: Agguaqatigiissillugu 67 km/t, killissarititaq 60 km/t-iusoq
Qinngorpumiit ikuallaaviup tungaanut aqqut takingaatsiartoq biilertunit sukkanerusumik ingerlaarfiussasoq takorloornarnerugaluarpoq. Aqqulli taanna sukkavallaamik ingerlaarfiusuni normu 4-tut inissippoq.
Qinngorput tungaanut aqqusinermi sukkanerpaamik 60 km/timemut ingerlaartoqarsinnaavoq, agguaqatigiissilluguli 67 km/timemut ingerlaartoqartarpoq.
Aqqusinermi kingaallassaat peerneqartoq
Ruujorilerisoqarnera pissutigalugu Quassunnguami aqqusinermi kingaallaffissaq peerneqarsimavoq. Ruujorilerisut maanna piareereerput, maannalu paasinarsivoq biilerlutik tassuuna ingerlaartut amerlanerulersimasut, sukkavallaamillu ingerlaartoqartalersimasoq.
- Aqqusinermi kingaallassaatit inisseqqittariaqassavagut, Bilo Høegh Stigsen oqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...