Ulluni marlunni kingullerni tunillatsissimasut nutaat 788-it

Ulluni kingullerni marlunni tunillatsissimasut nutaat paasineqartut 788-iupput. Misissorneqartartut nalinginnaasumit ikinnerulerput, taamaammat tunillatsissimasut paasineqanngitsut suli arlaqassasut, nunatta nakorsaaneqarfiata arfininngornermi paasissutissiinermini ilisimatitsissutigaa.

- Illoqarfinni ataasiakkaani tunillaasuunnerup qanoq ingerlanera malinnaavigiuminarnerulerpoq. Nuna tamakkerlugu misissortissimasuni 34 procentii tunillatsissimapput. Ataatsimut isigalugu nunatsinni tunillaassuunneq annertusiartorpoq, nunatta nakorsaaneqarfia allappoq.

Ilulissani pingasuugaangata marluk tunillatsissimasartut

Nakorsaaneqarfiup ilisimatitsissutigaa misissukkani tunillatsissimasut amerlanerpaasut Ilulissani paasineqarsimasut. Tassani misissortittut 68 procentii tunillatsissimapput.

- Illoqarfimmi tuniluunneq annertuvoq, maannalu utoqqaat illuanni aamma tunillatsissimasoqalerluni. Tassani tunillatsissimasut 16-it paasineqarput. Taakku tamarmik pingasoriarlutik akiuussusertissimapput. Tuniluunnerup killilersimaarneqarnissaanut iliuusissat aallartinneqareerput, nunatta nakorsaanera Henrik L. Hansen ilisimatitsivoq.

- Illoqarfimmi tuniluunnerup kinguneranik atuartitsiniarneq inuiaqatigiinnilu suliffeqarfiit allat aamma eqqorneqarput, meeqqammi inersimasullu amerlalluinnartut tunillatsissimapput, ilisimatitsissutigineqarpoq.

Qaanaami, Upernavimmi Uummannamilu ulluni kingullerni marlunni tunillatsissimasunik nutaanik paasisaqartoqanngilaq. Avannaata Kommuniani tunillatsissimasut nutaat 109-iusut nalunaarsorneqarsimapput.

Sisimiuni Aasiannilu tuniluunneq annertusiartortoq

- Aasianni Sisimiunilu tuniluunneq malunnaatilimmik annertusiartorpoq, taakkunani misissorneqartut 24 procentii aamma 32 procentii tunillatsissimapput. Maniitsumi aamma tuniluunneq annertusiartorpoq. Misissortittut 268-iusuni 58-it tunillatsissimapput, tassa 22 procentii, nakorsaaneqarfik allappoq.

Tuniluunneq suli annerulissaaq

Nuummi misissortittuni 944-suni 437-it tunillatsissimapput. Nunatta Nakorsaaneqarfiata naatsorsuutigaa illoqarfiit pingaarnersaani tuniluunneq piffissami qaninnermi suli annertunerulissasoq. Tasiilami nutaanik tunillatsissimasunik paasisaqartoqanngilaq.

Kujallermi tuniluunneq aatsaat aallartilaartutut nalilerneqarpoq. Aammali tuniluunnerup piffissami qaninnermi annertunerulernissaa naatsorsuutigineqarpoq.

- Qaqortumi misissortittut 343-ni 61-it tunillatsissimapput (18 %), Narsami misissortittut 187-iusuni 64-it tunillatsissimallutik ((34 %). Nanortalimmi 70-it misissortimmata ataaseq tunillatsissimasoq paasineqarpoq, taamaammat tuniluunneq suli malunnanngilaq. Qaqortumi Covid-19-imik tunillatsissimaneq pissutigalugu napparsimmavimmut innartinneqartoq ataasiuvoq, ilisimatitsissutigineqarpoq.

Nunatsinni tuniluunneq allaanerulluinnarpoq

Nunatta Nakorsaaneqarfiata naatsorsuutigaa Nuummi Ilulissanilu sapaatit akunnerni tullerni tuniluunnerpaaffiussasoq. Illoqarfinnili allani, tunillatsittoqarfiusuni tuniluunnerup annertusiartornissaa naatsorsuutigineqarpoq.

- Covid-19-imik tuniluunneq nunanut allanut sanilliullugu Nunatsinni allatorluinnaq ingerlavoq. Illoqarfiit akornanni attaveqatigiinnerit killeqarnerupput, taamaammat nunap immikkoortuini tuniluunneq assigiinngilluinnarsinnaasarpoq.

Nakorsaaneqarfiup erseqqissaqqippaa misissuinerit kingulliit takutikkaat akiuussusertissimasut tunillatsissimanerminni tunillaasinnaanerat annikinneerarsuusoq, akiuussusertissimanngitsunut sanilliullugit.

- Tamanna Omikronimut aamma atuunnersoq pillugu ilisimasat suli killeqarput. Misissuinerulli allap takutippaa akiuussusertereersimasut Deltamillu tunillatsissimasut Omikronimut illersuutissaqarnerusut. Tamanna Upernavimmut isumaqartorujussuusinnaavoq, taavanimi novemberimi 2021-mi tuniluunnersuaqarpoq.

Napparsimmavimmi uninngasut pillugit ullumi nutaamik paasissutissanik nalunaarusiortoqanngilaq.