Umiarsualivinnut tunngasuni attaveqaqatigiit suliniut Nunataaq innersuuppaat
Umiarsualivilerinermut tunngasut Nuummi umiarsualivinnut qanittuniittut salliutinneqartariaqarput, Nuuk Maritime Netværk taama isumaqarpoq.
Nuuk Maritime Netværkip suliniut Nunataaq, Imarsiornermik Ilinniarfiup aamma Jens Sallingip, Polar Seafoodimi piginneqataasimasup suliniutigisaat taperserpaat.
Attaveqaqatigiit siulittaasuat Cuno Jensen, Sermitsiaq.AG-mut taama oqarpoq:
- Suliniut imarsiornermut tunnganerusut tapersersorparput. Takusatsinni Sallingip aamma Imarsiornermik Ilinniarfiup suliniutaat imarsiornermut tunnganeruvoq. Suliniutip taassuma imarsiornermut tunngasuinnaat aalluppai. Allanik ilaartorneqanngilaq, Cuno Jensen oqarpoq.
Nuuk Maritime Netværk suliffeqarfinnik 60-t missaanniittunik ilaasortaqarpoq, taakku tamarmik umiarsualivinnut attuumassuteqarput. Attaveqaqatigiit Kommuneqarfik Sermersuumi aamma Namminersorlutik Oqartussat pigisaannit Sikuki Nuuk Harbourimit 2021-mi pilersinneqarpoq.
Aalajangerneq unitsikkallaraat
Nuummi umiarsualiveqarfinnut inissamut pilerinartumut suliniuteqarumasunik marlunnik naliliisoqarneranut, attaveqaqatigiit maanna oqallinnermut ilanngupput.
Kommunip aqutsiveqarfiata siornatigut suliniut Nunataaq kommunalbestyrelsimit akuerineqarnissaa inassutigigaluarpaa.
Inuussutissarsiornermilli ingerlataqartoq Kåre Moth-Lund, tusarniaanerup ingerlanneqarnerani siunnersuummik allamik tunniussaqarpoq, politikerillu taanna misissoqqaarniarpaat.
Kommunalbestyrelsillu taamaattumik aalajangerneq unitsikkallarpaat.
Suliniutip umiarsualiveqarfimmut qanittumi qitiusumik inissisimanera, umiarsualivinnut tunngasunut suliniutinut taamaallaat tunngasariaqartoq, Nuuk Maritime Netværkimi isumaqartoqarpoq:
Sumiiffinnik umiarsualivinnut tunngasunik amigaateqartoqartoq
- Allat ataqqillugit soorunami containerinut allanullu illoqarfimmi toqqorsiveqarnissamik pisariaqartitsisoqarpoq. Kisianni sumiiffiit umiarsualiveqarfinnut tunngasut taakkununnga atorneqassanngitsut isumaqarpugut, illoqarfimmi umiarsualivinnut tunngasunut inissisimaffiit amerlannginnerat pissutigalugu. Uagutsinnut umiarsualivinnik suliaqartunut atugassaatinneqartariaqarpoq.
Nuuk Maritime Netværkimi aqutsisoqatigiinni Bent Salling Polar Seafoodimeersoq ilaavoq, taanna suliniummi Nunataami qitiusumik inissisimavoq, kiisalu Mike Høegh, Imarsiornermik Ilinniarfimmi siulersuisuni siulittaasoq.
Apeqqut: Aqutsisoqatigiinni isumaqatigiippisi, imaluunniit Sallingimit aamma Imarsiornermik Ilinniarfimmi siulersuisuni siulittaasumit annerusumik sunnerneqarpisi?
- Isumaqatigiippugut, Cuno Jensen oqarpoq, attaveqaqatigiit suliniummut Nunataamut ersarissumik soqutigisaqartoqarneranik taanna aamma nassueruteqarpoq.
Umiarsualiveqarfinnut tunngasut suliniutinut umiarsualiveqarfinnut tunngasunut atorneqartariaqarput
Apeqqut: Suliniutip aappaani aamma umiarsualivinnut tunngasortaqaraluarpoq – ilaatigut aalisartut umiatsiaaralivissaqarniarnerat ajornakusoortoq oqaatigineqarpoq, Kåre Moth-Lundip puttasuliornikkut inissaqarnerulersinniarpaa. Tamanna apeqqutaavallaarsimanngila?
- Taama isumaqanngilagut. Imarsiornermik Ilinniarfiup immamut qaninnerulersillugu inissinneqarnissaa pingaarneruvoq, tassani naleqquttumik illutaqarsinnaavoq, kiisalu aalisarnermut atortunut inissiisarfeqarnissarput, taakku immamut qanittumiissinnaapput, ullumitut sumiiffinni allani sumi tamaaniinnatik, Cuno Jensen oqarpoq.
Kåre Moth-Lundip suliniutaa Avataq, assersuutigalugu sivisuumik biilinut uninngasarfissaqarpoq aamma betoniliorfittaqarluni, Nuuk Maritime Netværkip tamanna allamut inissikkusuppaa:
- Sanaartorneq allallu inuussutissarsiutit imarsiornermut tunnganngitsut inissamik pisariaqartitsinerat paasisinnaavarput, kisianni taakku sumiiffinnut allanut imarsiornermik sulianut ineriartornermut aporfiliinngitsumik inissinneqartariaqarput, Cuno Jensen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...