Ussassaarut
Umiarsuaq takornariartaat ikkarlittoq pillugu nalunaaruteqartut: - Ernumanarpoq
Inunnik ulorianartorsiortoqanngilaq, kisianni umiarsuup takornariartaatip nunami allanngutsaalisami ikkarlinnera ernumanarpoq, Issittumi Sakkutooqarfik nalunaarpoq.
Ussassaarut
Ussassaarut
Ussassaarut
Umiarsuaq takornariartaat Alpefjordimi Tunup avannaani nunami allanngutsaalisami ikkarlippoq. Kalaallit Nunaanni Politiit Issittumilu Sakkutooqarfik marlunngornermi ullaakkut ilisimatitsipput.
Umiarsuaq Ocean Explorer 206-inik ilaasoqarpoq, pisorlu ernumanarpoq, tassami ikiuisussat tikinniarnerat sivisusinnaammat, Issittumi Sakkutooqarfik oqarpoq:
- Umiarsuup takornariartaatip nunami allanngutsaalisami ajornartorsiornera soorunami ernumanarpoq. Ikiuisussat qaninnerit ungasipput, silarlulersinnaasarporlu.
- Pisumili tassani inunnik avatangiisinillu ulorianartorsiortoqanngitsoq paasivarput, tamannalu toqqissiallannarpoq. Pisoq qanimut malinnaaffigaarput, ilungersunartumillu tiguarput, Issittumi Sakkutooqarfimmi kommandørkaptajn, Brian Jensen oqarpoq.
Issittumi Sakkutooqarfik Facebookimi quppernermini taama allappoq.
Knud Rasmussen tallimanngorpat siusinnerpaamik tikissasoq
Ussassaarut
Umiarsuaq alapernaarsuut qaninnerpaasoq Knud Rasmussen, umiarsuarsuup takornariartaatip tungaanut aallartinneqartoq, Issittumi Sakkutooqarfiup marlunngornermi siusinnerusukkut Sermitsiaq.AG-mut ilisimatitsissutigaa.
Nalunaaruteqartoqarnerata nalaani Knud Rasmussen umiarsuarmit takornariartaammit 1.200 sømilit missaanni ungasissusilimmiittoq, sakkutooqarfik ilisimatitsivoq, taamaattumillu siusinnerpaamik tallimanngornermi ullaakkut tikissinnaavoq. Silali apeqqutaasinnaavoq, Issittumi Sakkutooqarfik nalunaarpoq:
- Ocean Explorer nammineq ingerlariaqqissinnaanngitsoq paasigatsigu umiarsuarmik aallartitsivugut. Periarfissaalerpallu timmisartumik qulaavaatitsiniarpugut, taamaalilluta nutaanik assinik naliliinissamut atugassanik pissarsissagatta.
- Suleqatitsinnut ikioqquvugut, umiarsuit allat umiarsuarmut ikkarlittumut sivikinnerusumik aggersinnaanersut paasiniarlugu, kommandørkaptajn Brian Jensen oqarpoq.
Umiarsuaq takornariartaat sumiiffimmeeqquneqartoq
Issittumi suleqatigiittoqarnerani Islandimi sineriammi nakkutilliisut suliamik immaqa ikiuisinnaapput. Tamatuma saniatigut Issittumi Sakkutooqarfiup umiarsuaq takornariartaat allat attaveqarfigaa, taanna Ocean Explorerip eqqaaniippoq.
- Umiarsuaq taanna sumiiffimmiiginnassasoq qinnuigineqarpoq, arlaannik pisoqassappat ikiuisinnaassammat, Issittumi Sakkutooqarfik allappoq.
Ocean Explorerip qanoq ikiorneqarnissaanut periarfissat arlallit sulissutigineqarput, Brian Jensen oqaluttuarpoq:
- Ulippat nammineq kaanngarniarsinnaapput, umiarsuarmit takornariartaammit eqqaaniittumit ikiorneqarsinnaapput, Knud Rasmussenimit ikiorneqarsinnaapput, imaluunniit suleqatitsinnit ikiorneqarsinnaapput. Tamarmik isumannaatsumut pinissaat pingaartipparput, Brian Jensen oqarpoq.