Umiarsuaq takornariartaat Nuummi Kofoeds Skolemut nerisassarpassuarnik tunissuteqarpoq
Kofoeds Skolemi pisortaq tassanilu atuisut nalinginnaanngitsumik sapaatip-akunneranik naanersiorput. Arfininngormat suliaqarsinnaasut tamarmik naatitanik nutaanik kiisalu nioqqutissanik panertunillu tigusinissamut ikiuiartortinneqarput.
- Karsimik mikisumik atisanik kamippannillu imalimmik tunniunneqartumik pissarsivugut (ilaasunit qimatat). Tamatuma saniatigut umiarsuaq arfininngorpat tikissaaq, taakku nerisassarpassuarnik tunissuteqarusupput.
Nuummi Kofoeds Skolemi psortamut Blue Waterimi tikittunut sullissisuanit sapaatip-akunnerata siuliani taama nalunaaruteqartoqarpoq.
Pisortap Charlotte Ludvigsenilli pineqartut qanoq annertutiginissaat takorloorsinnaasimanngilaa.
Umiatsiaaqqanik assartorneqartut
Umiarsuaq takornariartaat MSC Explore 1 arfininngormat Nuummut tikittussaagaluarpoq, tassungalu atatillugu palletinik naatitanik, qajuusanik, pastanik, neqinik, immunnik, kaaginut akussanik allanillu Kofoeds Skolemut tunissutigineqartussanik usingiartussaavoq.
Silali pissutigalugu umiarsuaq talissinnaanngilaq, palletillu arfinilinnut tunniunneqartussanut taarsiullugu 30-t tunniunneqarput, taakku umiatsianik mikisunik sila pissutigalugu assartorneqarput. Palletit isaterlugit assartorneqartariaqarput, tamatumalu kingorna poortorneqaqqeriarlutik Kofoeds Skolemut assartorneqarlutik. Blue Waterimi tikittunik sullissisoq, Alexandra Lind, Sermitsiaq.AG-mut taama oqaluttuarpoq.
Nerisassat naatitallu nutaat sapinngisamik inunnut amerlanerpaanut iluaqutaaniartussat taama amerlatigisut tigusussanngoriasaarneri pissutigalugit, arfininngorneq ulapaarfiusimasoq, Charlotte Ludvigsen oqaluttuarpoq.
- Ilaquttakka ikiortiserisariaqarsimavakka, atuisuttalu ilaat ujartorlugit, taakku soorunami aamma ikiuerusupput.
Inissaq naammanngitsoq
Atuarfik inissaqanngitsoq paasinarsivoq, taamaattumillu nerisassat ilaat qerisullu Blue Waterip toqqorsiviinukaanneqarput, atuarfiup nerisassanik ingerlatitseqqinnissaata tungaanut tassaniissallutik.
- Blue Waterip Frelsens Hærimut, angerlarsimaffeqanngitsut unnuisarfianut, utoqqaat illuanut aamma paaqqinnittarfinnut nerisassanik agguaanissamut tunngatillugu attaveqarnermik ikiorpaatigut. Nammineq taama amerlatigisunik atuisinnaanngilagut, Charlotte Ludvigsen oqaluttuarpoq.
Nerisassat asiusinnaasut piaarnerpaamik agguaanneqassasut oqaatigaa, marlunngornermilu arlallit nerisassanik aallernissamut aggersarneqarput.
Nioqqutissat asiusartut aamma panertitat assigiinngillat. Nioqqutit sivisunerusumik atasinnaasut Kofoeds Skolemut iluaqutaassapput, pisortaq oqaluttuarpoq.
Pastat ukiumut ataatsimut naammattut
- Maanna assersuutigalugu ukiup tulliata tungaanut imaluunniit sivisunerusumik qajuusassaqalerlutalu pastassaqalerpugut, taamaammat aningaasaqarnermut tunngatillugu periarfissaqarnerulerpugut.
Nioqqutissat asiusinnaasut atuisunut aamma allanut aningaasaqarnikkut pisariaqartitsisunut peqqinnarnerusunik nerisassaqartitsinerat, taassuma nuannaarutigaa.
- Atuisugummi nerisassanik namminneq nassataqarsinnaanngillat angerlarsimaffeqannginnamik, kisianni aamma ilaquttaminnut ikinngutiminnullu pisariaqartitsisunut nerisassanik agguaapput, taakkulu aamma peqqinnartunik nerisassanillu nutaanik pissarsipput, agguaasinnaanerput ataqatigiinnermut tamanna isumalerujussuuvoq.
Umiarsuaq ataasinngormat Qaqortumiippoq, Sermitsiaq.AG-p paasissutissaatai naapertorlugit nerisassanik palletinik 15-inik agguaasimapput.
Tunissuteqarnerit pillugit Sermitsiaq.AG umiarsuaatileqatigiiffimmit oqaaseqartitsiniarsarivoq.