Umiarsuaq takornariartaat Tunumi tinigussaasoq

Umiarsuaq takornariartaat Tunumi Nunami allanngutsaaliukkami Alpefjordimi Mestersvigip eqqaani ikkarlippoq.

Kalaallit Nunaanni Politiit pigaartut pisortaat, Ole Hald, Sermitsiaq.AG-mut taama uppernarsaavoq.

- Ataasinngornermi nal. 15.10 Issittumi Sakkutooqarfimmit paasivarput, Ole Hald oqarpoq.

Umiarsuaq Ocean Explorerimik ateqarpoq, 206-nillu ilaasoqarluni. Oqartussat paasissutissaatai naapertorlugit pisumut atatillugu inunnik ajoqusertoqarsimanngilaq.

Knud Rasmussen aallartinneqartoq

Ulippat umiarsuaq nammineq ingerlaqqissinnaanersoq takussallugu pilersaaruteqartoqarpoq.

Politiit Issittumilu Sakkutooqarfiup pisoq qanimut malinnaaffigaat, pisumi allanngortoqarpat ilaasut umiarsuarmit angallanneqartariaqalernerannik kinguneqarsinnaavoq.

Umiarsuaq alapernaarsuut Knud Rasmussen umiarsuarmut takornariartaammut ikiuiartortsinneqartoq, Issittumi Sakkutooqarfik Sermitsiaq.AG-mut ilisimatitsivoq. Taamaakkaluartoq umiarsuaq alapernaarsuut ullut arlallit qaangiuppata aatsaat tikittussaavoq.

Issittumi Sakkutooqarfik naapertorlugu umiarsuaq takornariartaat ikkarlinnerminut atatillugu annerusumik ajoqusersimanngilaq.