Umiarsuarnut takornariartaatit akiliutigisartagaat qaffassapput
Naalakkersuisut umiarsuit takornarianik angallassisartut umiarsualivinnut akiliutigisartagaasa qaffanneqarnissaat pillugu siunnersuutaat Inatsisartut Akileraartarnermut Akitsuusiisarnermullu Ataatsimiititaliaata tapersersorpaa
Umiarsuit takornarianik angallassisartut ukiortaamiit atuutilersumik ilaasumut ataatsimut 525 koruuninik umiarsuarnut ilaallutik takornariartartut akiliutaannik, mannakkut 450 koruuninik annertusseqaraluartumik, akiliuteqartalissapput.
Naalakkersuisut umiarsualivinnut akitsuutip aamma takornariat umiarsuarnut ilaallutik takornariartartut akiliutigitinneqartartup ukiumut 1,9 mio. koruuninik isertitsissutaasarnissaa naatsorsuutigaat.
Kisianni Inatsisartut Akileraartarnermut Akitsuusiisarnermullu Ataatsimiititaliaata siunnersuutip taamak kingusitsigisumik saqqummiunneqarnera uparuarpaat.
– Inatsisartut Akileraartarnermut Akitsuusiisarnermullu Ataatsimiititaliaata Naalakkersuisunut inassutigissavaa siunissami umiarsuarnut takornarianik angallassisartunut akitsuutinik, imaluunniit assigisaannik allanngortitsisoqassatillugu tamakku ima siusitsigisumik saqqummiuttaqqullugit inuussutissarsiutinik ingerlatsisut tamakkuninnga attorneqartussat periarfissinneqarniassammata allannguutinik akigititaminnut ilanngussinissaminnut. Umiarsuarnut takornarianik angallassisartunut ilaanissat qaammaterpassuit sioqqullugit amerlanertigut inniminnerneqartarput akilerneqartarlutillu, Inatsisartut Akileraartarnermut Akitsuusiisarnermullu Ataatsimiititaliaat isumaliutissiissutimi allappoq.
Siunnersuut Inatsisartuni siullermeertumik 26. septembari oqaluuserineqarpoq Inatsisartunilu partiinik tamanik tapersersorneqarluni.