Umiarsuit amerlavallaat akeqanngitsumik talittarput

Umiarsuit amerlanerpaat nunatsinni umiarsualivinni talittut akitsuummik akiliiineq ajorput.

Aalisariutit nunatsinnit pigineqartut, sakkutuut naalagaaffiillu allat umiarsuaat, kalaallit umiarsuaataat 200 bruttotonsinit minnerit, namminersorlutik oqartussat kommunillu umiarsuaataat, imaani misissuinermik ingerlatsisut taamattaaq assartuutit ilaasortaatillu nunatsinnit pigineqartut umiarsualinermi akitsuummik akiliineq ajorput, naak tulannermikkut umiarsuit allat assigalugit aserfallaasaraluartut.

Naaja Nathanielsen, Inuit Ataqatigiit ualimut Inatsisartuni siunnersuutigaa, umiarsualivimmiinnermut aamma umiarsuit takornarianik angallassissutit ilaasunik angallassinerannut akitsuut allanngorteqqullugu naalakkersuisut inatsimmik allanngortitseqqullugit, taamaaliornikkut umiarsuit akitsuummik akiliisartut ikiliseqqullugit. Naaja Nathanielsenip taamattaaq siunnersuutigaa pineqartunut akileraarutigineqartussat amerlassusissaannik nalileeqqeqqullugit.

Ullumikkut umiarsualivimmi akitsuut nunatta karsianut 20 million koruunit isertitsissutaasarpoq. Aningaasat amerlanerpaat umiarsuarnit takornariartaassuarnit isertitsissutaasarpoq, januaarip aallaqqaataa 2009 aallarnerifigalugu, takornariaq ataaseq 525 koruuninik isertitsissutaasarluni.

Atuisut akiliisarnissaat
Umiarsualivimmi akileraarutit akilersittarnissaannik inatsit tunngavimmigut ukiuni 20-ni allanngortinneqarsimanngilaq. Ukiuni pineqartuni inuiaqatigiit silarsuarlu allanngorsimapput. Nunarsuaq tamakkerlugu aningaasatigut ajornartorsiorneq inuiaqatigiillu agguataarnerisa ineriartornerata aningaasaqarnerput, taamalu aamma ineriartornissamut periarfissavut assorujussuaq ilungersunartorsiortillugit.

Kalaallit Nunaanni umiarsualiviit nutaat aningaasaliiffigineqarnissaat pisariaqarpoq soorlu Nuummi nutaamik sanaartornissamut.

Namminersortut angisuunik nunatta karsiaq avaqqullugu sanaartussagunik aningaasartuutitik uterteqqinniartarpaat atuisut akiliutaat aallaavigalugit.