Umiarsuit angalasut amerlinerat ernummatigineqarpoq
– Apeqqutaaginnarpoq qaqugu ajutoortoqarnissaa, Kangilinnguani Sakkutooqarfik mianersoqqusivoq, taakku Kalaallit Nunaata imartaani umiarsuit takkornarianik angallassisartut amerliartuinnarnerat ernummatigaat.
– Umiarsuarsuit angisuut takornarianik angallassisartut uagutsinnut unamminartuupput, sukkutuut naalagaat kommandørkaptajn Jan Bøgsted oqarpoq, silaannaap allanngoriartornera pillugu »Nuuk Climate Days«-imi isumasioqatigiinnermi.
Angut taanna isumaqarpoq annertuumik ajutoortoqarnissaa qaquussanersoq apeqqutaaginnartoq, tassami umiarsuit takornarianik angallassisartut angisuut issittup imartaani angalasarneq sungiusimanngimmassuk.
Matumani pineqanngillat umiarsuit takornarianik angallassisartut soorlu »Fram« imaluunniit russit sikusiutaat, Svalbardip aamma Islandip akornanni angalasartut kiisalu Kalaallit Nunaata kangianut aqqusaartartut.
Ajornartorsiutaapput umiarsuit angisuut, tusintinik arlalinnik ilaasoqartartut, soorlu assersuutigalugu »Crown Princess«, taanna qaammammi tullermi Kalaallit Nunaannut tikittussaavoq, Jan Bøgsted oqarpoq.
Sakkutuut naalagaata kommandørkaptajnip isumaa malillugu taava illersornissamut sakkutooqarfiup timmisartoq Challengeri piffissaq tamaat atorsinnaasariaqaraluarpaat. Maannakkorpiaq illersornissaqarfiup qaammammut ullut taamaallaat arfineq-pingasut timmisartoq alapernaarsuut atorsinnaavaat.
– Uanga orniginerugaluarpara ulloq unnuarlu nalunaaquttap akunneri 24-t timmisartumik alapernaarsuummik atugassaqartitaaguttta. Taamaattoqarpat qulakkeersinnaavarput pilertortumik ornigutipallassinnaaneq, qanoq ittoqarneralu paasillugu, ajutoortoqarpat. Tamannami ullut ilaanni pissaaq, Jan Bøgsted oqarpoq.