Umiarsuit takornariartaatit nunatsinnut pilerngupput
Umiarsuit takornariartaatit ukiup ataatsip ingerlanerinnaani 50 procntinik amerleriarput, taamalu ukioq 2008 Kalaallit Nunaata sineriaani umiarsuakkut angallannermi ukioq maannamut ilapaarfiunerpaajusoq Kalaallit Nunaanni sakkutooqarfik eqqoriaavoq.
Kalaallit Nunaat umiarsuit takornariartaassuit atorlugit takornarianit ornitassatut nuannarineqarlualersimavoq.
- Issittoq annertoorujussuarmik sammineqalersoq takusinnaavarput. Inuit amerlaqisut aatsitassarsiornermut imaanilu misissueqqaarnernut minnerunngitsumillu takornariaqarnermut aningaasaliisalersimapput, taamak kontreadmiral Henrik Kudsk, Kalaallit Nunaanni Sakkutooqarfimmi pisortaasoq, oqarpoq.
Ukioq manna umiarsuarnik takornariartaatinik tikitsisarfik maajimiit oktobarip aallartinnissaata tungaanut ingerlassaaq. Piffissami tassani Kalaallit Nunaanni Sakkutooqarfik naapertorlugu umiarsuit takornariartaatit 45-t kalaallit nunaata imaartaatigut angalasussaapput, amerliartornissaallu ilimagineqarpoq. Umiarsuit ilaasui maannakkorpiaq 55.000-t missaanniipput, tassa Kalaallit Nunaata innuttaasa amerlaqataasa missaat.