Umiarsuit takornariartaatit tikeqattaarnerat naammassivoq: Nuummut tikittartut 52 procentinik qaffariartut
Sikuki Nuuk Harbourip 2024-mi umiarsuit takornariartaatit taama amerlatigisut tikinnissaat naatsorsuutigaa.
Sapaatip-akunnerani matumani umiarsuaq takornariartaatip kingulliup Nuummi umiarsualivik qimappaa.
Sikuki Nuuk Harbour, umiarsualivimmik ingerlatsisoq taama ilisimatitsivoq, tikittullu amerlassusaat isiginiaraanni angalaffiusoq pitsaalluinnartoq naatsorsuiffigaat.
2022-mut sanilliullugu tikittut 52 procentinik amerlanerupput, umiarsualivillu ataatsimut isigalugu piumasaqarnermut malinnaasinnaasimavoq.
Piffissani arlalinni umiarsuit takornariartaatit pingasut ataatsikkut tikittarsimapput, umiarsuit allat tikittarnerisa saniatigut:
Aalajaannissamik pisariaqartitsiffiusoq
- Umiarsualiviup pisut ukioq mannatut taama annertugisut nammassinnaassagunigit aalajaaffiusariaqarpoq.
- Kissaat tamarmik tunniunneqarsinnaasimanngillat, ilaanneeriarluta umiarsuit takornariartaatit kisarsimatittarpavut, ikaartaanillu umiarsualivimmut atueqqusarsimagaluarlugit, umiarsualiviup piumaneqartut tamangajalluinnaasa tunniussinnaasimavai, Lars Erik Bengtsson, Sikukimi Umiarsualivimmi Aqutsisoq oqaluttuarpoq.
Umiarsuarnik takornariartitsisarneq aasaq manna annertuumik oqallisaavoq. Takornariartitsineq aningaasanik tapiissuteqarnerussasoq naalakkersuinikkut kissaatigineqarpoq, ukiorlu nutaaq aallarnerfigalugu umiarsuarnik takornariartunut akileraarut atulerseqqinneqassaaq. Tamatumalu saniatigut umiarsuaq takornariartaat Ocean Explorer, Tunup Avannaarsuani Nunami Allanngutsaaliukkami 206-inik ilaasoqarluni ikkarlimmat, annertuumik maluginiarneqarpoq.
Umiarsuit takornariartaatit taama amerlatigisut aappaagu tikissasut Sikukip naatsorsuutigaa, tassami tikittussat 58-it inniminniisimapput. Tamatuma saniatigut 2025-mi suliat suli amerlanerussasut umiarsualiviup naatsorsuutigaa, illoqarfimmi mittarfissuaq nutaaq ammartussaammat.
Tatineqarnerulernissaq naatsorsuutigineqartoq
Umiarsualivimmi ulapittoqarnerulerneranik kinguneqassaaq:
- Umiarsuarnut Atlantikoq ikaarlugu angalasunut talittarfik tassani pineqarneruvoq, umiarsuit takornariartaaitt anginerusut aamma kilisaatit tikittarfigisaannik, takornariartaatileriffiup nalaani suliaqarsinnaassuseq tatineqartarpoq, sapaatip akunneratalu ingerlanerani amerlasooriaq takornariartaatit tikinnissaannut aamma kilisaatit usingiarnissaannut piareersarnerpassuaqartarpoq, Sikuki Nuuk Harbour allappoq.