Umiartornermik Ilinnarfik Paamiuni siunissaqanngilaq
Palle Christiansenip uummaarissup tilluunnermi pissartat matematikimilu professorit pillugit apeqquterpassuit utertippai
- Umiartornermik Ilinniarfik Paamiuniikkuni ingerlallualinngisaannassaaq, taamaattumillu ilinniarfik illoqarfimmut allamut nuussavarput, ilinniagaqarnermut, ilisimatusarnermut nunanilu avannarlerni suleqatigiinnermut Naalakkersuisoq Palle Christiansen, Demokraatit, oqarpoq.
Taamatut akissuteqarpoq Siumumeersup Ruth Heilmannip apeqqutaasa marluk nangitsissutaatut, taassuma nuussinissaq, ilinniagaqartitsinermut periusissami Palle Christiansenip Upernaakkut ataatsimiinnermi saqqummiussaani taaneqareersumi, ernumanartoqartittorujussuugamiuk.
Palle Christiansen uummaarissoq Ukiakkut ataatsimiinnermi akunnermi apeqqarissaarfimmi siullermi apersorneqarpoq, pisarnermisullu apeqquterpassuit nunamik pingaartitserpalaartutut utertippai.
Matematikimi professori
Namminersorlutik Oqartussat maannakkorpiaq Nuummi atuarfimmi atorunnaartumi Qorsussuarmi misiliummik suliniut ingerlappaat, boot camp-imik taaneqartoq, tassani inuusuttut ulloq unnuarlu akunnerni 24-ni sammineqarlutik, unittoorsimasut ilinniagaqarfimmut utertinniarsaralugit.
Boot camp-imi ilinniartitsisorineqartut ilagaat qallunaaq tilluunnermi nunarsuarmi pissartaq qallunaarlu matematikimi professori, tamannalu pissutigalugu ilaatigut Siumumeersoq Doris Jakobsen, Inuit Ataqatigiinneersoorlu Aqqaluaq B. Egede, aperipput kalaallit timersullammaat matematikimilu ilinniartitsisut ulluni namminersorfiusuni naammaginarunnaarsimanersut.
Palle Christiansenip atortussaqartinngilluinnarpaa Kalaallit Nunaata nunanit alllanit misilittakkanit iluaquteqarniarnissaa, kingorna nunap nammineq innuttaanit atorneqarsinnaasunik, apeqqutillu apereqqilluni utertippai:
- Aamma Danmarkimi kræftimik katsorsartinnissamut naaggaassaagut pissutigalugu namminersuleratta?
Palle Christiansenip ersarissumik narrujuummersimasup Siumup oqarnera arlaleriarluni utertittarpaa, tassa Naalakkersuisut akisussaaffimminnik qimarratiginnittut kalaallit Danmarkimi ilinniagaqartut qallunaat SU-annik pisartagaqalersinnerisigut.
Palle Christiansen sisamanngormat ualikkut tusagassiortunik katersortitsissaaq, tassani nassuiassallugu kalaallit Danmarkimi ilinniagaqartut qallunaat SU-annik pisartagaqalernerat qanoq paasisariaqarnersoq.