Umiatsiap tungaanut arlaleriarluni seqqortoqartoq
Umiatsiaq Upernavimmit pingasunngormat aallaqqammersoq arlaleriarluni umiatsiap tungaanut seqqortoqarpoq. Politiit suliaq pillugu suli paasiniaapput.
Emilie Olsvig Heilmann ilaquttanilu Upernavimmit umiatsiaminnik avalaqqammerlutik amiilaarnartumik misigisaqarput.
Avalaqqammerlutimmi umiatsiartik tungaannut arlaleiarluni seqqortoqarpoq.
- Susoqarnissaanik ilimasunnginnatta tuparujussuarpugut, aamma umiatsiap saneralaanut aallaasip imassai tuttaramik, taamaaseriarmat uiga motorit sakkukillileraluaramigit sunaaffa tupalluni taamaasisoq. Tupaqqanermut ernera umiatsiap naqqanut nusullugulu peqitippara, uigalu suaarlugu motori tamaartequllungu seqqortaartumut tarripallaqulluta, Emilie Olsvig Heilmann Sermitsiaq.AG-mut oqaluttuarpoq.
Umiartortussanut nalunaartut
Uia tarrinniapallappoq raatiuaqqakkullu kalerriilluni tassuunaartoqalerpat sissueqqusilluni.
- Taamaalinerani uanga politiinut sianerpunga. Aappilattumut aqqusaarniaratta Upernaviup tunuatigoorpugut. Assut tupannarpoq taama ilimasungata taamaattoqarmat. Qujanaannartumillu mallerami taamaalilluta eqqorneqarata, Emilie Olsvig Heilmann oqarpoq.
Politiit pisoq misissorpaat
Umiatsiap tungaanut seqqortoqarsimanera politiinit Sermitsiaq.AG-mut uppernarsarneqarpoq. Pisoq pillugu politiinut saaffiginnissut pingasunngormat nalunaaqutaq 16.09 tiguaat.
- Susoqarpiarsimanersoq Upernavimmi politiinit misissorneqaleruttorpoq. Pisumi inunnik ajoqusertoqanngilaq, politiinit Gideon Quist Sermitsiaq.AG-mut oqarpoq.