Umimmaat akerarinerpaasaat tassaapput ukiut aputilerujussuit
Umimmaat piaqqiarineqartut inuunerminnilu ukioq siulleq aniguisut amerlassusaat umimmaat amerlassusiannut aalajangiisuulluinnarput. Piaqqallu annannissaminnut anaanamik nerisassarsiorsinnaanerat isumalluutigaat. Aamma ukiukkut. Ukiut aputilerujussuit issittup uumasuinut ingerlaartunut manngertumillu qaalinnut ulorianartorsiortitsipput. Tamannalu immaqa siunissami atugarilissavaat.
Ilisimatuut ukiuni 25-ni issittup avannaarsuani, Avannaani Zackenbergip eqqaani, umimmaat malinnaaffigeqqissaarsimavaat amerlassusiallu misissortarlugu. Tamanna uumasut ingerlaartarnerannik uumanerannillu nutaamik takutitsivoq.
Aviisi Sermitsiaq taama allappoq.
Maanna ilisimatuut paasisat nutaat katersorlugit periuisissiorsimapput, tassanilu takuneqarsinnaavoq silap pissusiata allanngornerani umimmaat qanoq pisarnersut, aammalu sumiiffinni umimmanniartarfiusartuni uumasut qanoq ililluni pitsaanerpaamik nakkutigineqarsinnaanersut.
Aput akornutaasinnaavoq
Umimmaat ukiukkut qasuersaarnerusarput. Arnavissat ilumittut ukiukkut timaasa kissassusiat aalajaatsuuginnartartoq, arnavissat ilumioqanngitsut timimik kissassusiat 1 gradi inulaarlugu appartittarpaat.
Timip kissassusia 1 gradiinnarmik apparaluartoq tunnup uumaniarnermi pingaaruteqarluinnartup timimi uunneqarnera malunnartumik appariartarpoq. Timip kissassusiata appartinnera pissutigalugu ukiuunerata naanerani umimmat ilormioqanngitsut umimmannit ilumittunit, timip kissassusianik appartitsinngitsunit, 20 kiilut missaannik oqimaannerusarput.
Umimmaat piarallit ilumiuminnut kingornalu piaqqaminnut, upernassakkut (marsimi-apriilimi) piaqqiaasunut immummik sananermut, nukissaq sapinngisamik annertunerpaaq atussavaat. Taavalu aperujussuarneratigut nerisassat matoorneqaraangata piffissaq ilungersunartoq pilersarpoq.
- Annertuumik apigaangat takusinnaasarparput umimmaat nerisassarsiorlutik angalaalersartut. Tamanna nukissamik pisariaqartitsivoq, umimmannullu ilumittunut erloqinarsinnaavoq, Aarhus Universitetimi Institut for Bioscience – Arktisk økosystemøkologi-meersoq, misissuinerni peqataasarsimasoq Lars Holst Hansen oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: