Unammiuaarnerit akisuut naaggaarpaat
Mimi Karlsen Nuummi 2016-imi Arctic Winter Gameseqarnissamut aningaasarpassuarnik qinnuteqarpoq
Sermitsiaq.AG-mi atuartartut amerlanersaasa 50 million koruunit sapaatip akunnerani ataatsimi unammiuaarnerni akimasuuni Arctic Winter Gamesini atorneqarnissaat naaggaarpaat, nunatsinni timersorneq naalakkersuinermik suliaqartunit sumiginnarneqartoq.
Atuartartuvut aperisimavagut 50 million koruunit timersornerup iluani pitsaanerusumik atorneqarsinnaanersut, Nuummili 2016-mi taamatut unammiuaartitsineq taama akeqarmat.
Taamaatullu isumaqarput!
Læs også: "Kan vi bruge pengene bedre"
Atuartartut 841-t taasisitsinermi peqataapput: 563-t imaluunniit 66,9 procentit taama isumaqarput, atuartartut 245-t imaluuunniit 29,1 procentit naagaarlutik atuartartullu 33-t imaluunniit 3,9 procentit apeqqummut isummernatik.
Namminersorlutik oqartussat Kommuneqarfiullu Sermersuup pilersaarutaanut qaffasissunut oqaaseqaaterpassuupput, ataatsillu maluginiarpaa naalakkersuisut siorna ivigaaraasanik arsaattarfiliornissamut 5 million koruunit naaggaarmatigik: 50 million koruunit atorlugit ivigaaraasanik arsaattarfiit qulit sananeqarsinnaapput, taakkulu timersortartut nuannaarutigalugillu iluaqutigissagaluarpaat oqalugiarnerpassuit nuimasorpassuillu Canadamut, Alaskamut Sibiriamullu angerlareerpata.
Taperserneqarpoq
Kultureqarnermut naalakkersuisoq Mimi Karlsen Inuit Ataqatigiinnersoq ualimut Inatsisartuni tapersersorneqarpoq 2016-mi Arctic Winter Gamesip nunatsinni ingerlanneqarnissaanut, aningaasartuutit nunatta karsianiittut atorlugit.
2016-mil Arctic Winter Games 44,5 million koruuniusussatut missingersuunneqarpoq, nalornissutaavorli Nuup Iqaluillu akornanni timminermut aningaasartuut qanoq annertutigissanersut, tassanili ishockeymik pissartanngorniunneq ingelranneqassaaq. (Pissartanngorniunnissamut Nuummi sukuutsertarfiliornissamik pilersaarutit taamaatinneqarput).
Læs også: "- Vi kan bruge pengene bedre"
Inunnut akimasuunut 100-nut, ingerlatseqataasunut 340-nut, kulturikkut ingerlatsisunut tusagassiortunullu, timersortartunut 1.300-nut piumassutsiminnullu sulisunut 1.300-nut aningaasartuutit namminersorlutik oqartussat Kommuneqarfik Sermersuullu avissavaat. Aningaasartuutit ilaat aningaasaliisoqarneratigut matussuserneqassapput.