Uninngasut nutaat sisamat - tuniluunnerlu suli ingerlaarpoq
Nunatta nakorsaaneqarfianiit kisitsisit saqqummiunneqarnerani nassuiaatip takutippaa PCR atorlugu misissortittut akornanni 54 procentii tunillatsissimasut. Misissorneqartut 199-iupput taakkunanngalu 107-it tunillatsissimallutik. Taassuma saniatigut Covid-19-eqarlutik napparsimavimmut unitsinneqartut sisamat nutaat ullup ataatsip ingerlanerani unitsinneqarsimapput.
Suliffeqarfinni, atuarfinni, utoqqaat illuini allanilu pisortat najugaqarfiini coronavirus suli tuniluuppoq. Peqqinnissaqarfimmi sulisut napparsimallutik suliartunngitsoortartut amerlasuunerat nunatta nakorsaanerata immikkut maluginiaqquaa.
Tunillatsissimasut nutaat 107-iuppunga napparsimavinnullu unittut nutaat sisamaallutik. Maanna nuna tamakkerlugu uninngasut aqqaniliupput. Nuummi sisamat, Ilulissani pingasut, Qaqortumi marluk, Sisimiuni ataaseq Uummannamilu ataaseq. Nuummi uninngasut pingasut maanna angerlartinneqarsimasut nakorsaanerup aamma paasissutissiissutigaa.
- Uninngasoq ataaseq taamaallaat Covid-19 pingaarnertut nappaatigalugu uninngavoq. Uninngasuni peruluttoqanngilaq.
- Uninngasut sisamat Covid-19-imik tunillatsissimasut allamik nappaateqarlutik uninngapput. Taakkununnga Covid-19 sunniuteqarpoq, kisiannilu nappaat alla uninnganeranut pissutaanerpaallutik. (Kategori 2).
- Uninngasut arfinillit Covid-19-imik tunillatsissimasut allamik peqquteqarlutik uninngatinneqarput. Taakkununnga tunillatsissimaneq napparsimavimmi uninnganermut tunngaviunngilaq. (Kategori 3).
Nunatta nakorsaaneqarfia nittartakkamini paasissutissiivoq.
Tunillatsissimasut amerlapput
Kommunini tamani tuniluunneq januarimi annertuvoq. Nuna tamakkerlugu misissortissimasut akornanni tunillatsissimasut 33 procentiupput.
- Peqqinnissaqarfinni misissuinerup takutippaa Uummannami januarimi tuniluunneq annertunerpaajusimavoq. Misissortittummi akornanni 79 procentit tunillatsissimapput. Paamiuni misissortittut akornanni 51 procentit tunillatsissimapput, Narsami 39 procentit, Ittoqqortoormiini 38 procentit, Maniitsumi 27 procentit Upernavimmilu 25 procentit. Nanortalimmi, Qeqertarsuarmi Tasiilamilu misissortittut akornanni taamaallaat 5 procentit annikinnerusumilluunniit tunillatsissimasarput, Nunatta nakorsaaneqarfia allappoq.
Tuniluunneq sumiiffinni assigiinngitsuni januaarip ingerlanerani assigiinngitsumik ingerlasimasoq kisitsisit takutippai.
Covid-19-ip tuniluunnerani napparsimavinni unittut katillugit 105-iuppunga, taakkunannga 69-it januarip ingerlanerani uninngasimapput.
Meeqqat marluk Covid-19-imik napparsimareernermi kingunerluuteqartut suli uninngapput.
