Unnuisarfik: Sooq uagut paasissutissinneqassanngilagut?
Ullumi ataasinngornermi ataatsimiititsinermi paasissutissiiffiusumi immikkut toqqakkat 40-t coronami pissutsinut atatillugu katersuuttarnernik killilersuinerit pillugit aalajangiinernut kingullernut tunngasunik paasissutissinneqarnissamut qaaqquneqarsimapput. Kisianni qaaqqussissut ataaseq amigaataavoq, Nuummi angerlarsimaffeqanngitsut unnuisarfiannit oqaatigineqarpoq.
Peqatigiiffiit soqutigisaqartullu immikkut toqqakkat kisimik najoqqutassat killilersuinerillu atuuttut pillugit coronamik suliaqartunik paasissutissiiffiusumik ataatsimeeqatiginissaannut ataasinngornermi qaaqquneqarsimapput.
Inuit amerlasuut katersuunnissaannik killilersuinerit pissutigalugit coronamik suliaqartut ataatsimiinnermut peqataasussanik aalajangersimasumik amerlassusilinnik aggersaanissaq pingaarutissimagaat qaaqqusissummi oqaatigineqarpoq. Kisianni pingaarnersiuineq Nuummi angerlarsimaffeqanngitsut unnuisarfiata Cafe Kialaarfiup ulluinnarni aqutsisuata Storm Ludvigsenip paasiuminaatsippaa.
- Tamatigut peqataasariaqarpugut, corona pillugu paasissutissanik annertunerusunik pissarsisinnaaniassagatta, Storm Ludvigsen Sermitsiaq.AG-mut oqarpoq.
Najoqqutassat malinnissaat ajornakusoortoq
Angerlarsimaffeqanngitsut unnuisarfianni tupeqarfimmilu, maanna inissiarsuarnut nuunneqarsimasumi, angerlarsimaffeqanngitsut 150-it missaanniipput, Storm Ludvigsen oqaluttuarpoq.
Taanna nassuiaalluni oqarpoq, atuisut akornanni tarnikkut napparsimasorpaalussuaqartoq, peqqinnissaqarfimmi inissarsisinnaanngitsunik. Tarnikkut napparsimasunik assigiinngitsunillu atornerluisunik sullitaqarnermi najoqqutassanik isumatusaartumik malinninniarneq suliassanngortarpoq ilungersunartoq, oqarpoq.
- Killilersuinerit najoqqutassallu uatsinnut isumaginiassallugit ajornakusoortorujussuuvoq. Assersuutigalugu angerlarsimaffeqanngitsut angerlarsimaffianni assannut sprittimik saqqummiiginnarsinnaanngilagut, ingerlaannaq tammassammat. Aamma Danmarkiliarnissamut aningaasartuuteqartariaqarsimavugut, tassanilu angerlarsimaffeqanngitsut unnuisarfiannut pulaarsimalluta, coronamik qanoq isumaginninnerat paasiniarlugu, oqarpoq.
Tapersersorneqarnermik amigaateqartut
Storm Ludvigsen tusarnaarnerumalluni apeqquterpassuillu pilersartut paasisaqarfigiumallugit ataatsimiinnernut paasissutissiiffiusunut ilanngulluni qaaqquneqarusuppoq.
- Pisut qanoq iliuuseqarfiginissaannut ilinniartinneqarsimanngilagut, taamaammat coronamik suliaqartunit suliassat isumagisinnaanissaanut tapersersorneqarnerunissamik pisariaqartitsivugut, oqarpoq.
Storm Ludvigsen erseqqissaalluni oqarpoq, coronap ajornartorsiortitsinerata nalaani pissutsit ilungersunarsitillugit paaqqinniffiit neqeroorutillu allat assigalugit angerlarfimaffeqanngitsut angerlarsimaffiinik matooraaginnarsinnaanatik.
Coronamik suliaqartut ataatsimiinermi ilaatigut nassuiassavaat, aalajangiinerit sumi pisarnersut suullu tunngavigineqartarnersut. Pinaveersaartitsinermik suliniummut uppernarsaatissanik tunngeqartumut atatillugu Kalaallit Nunaanni coronap tuniluunnera akiorniarlugu periusissiaq siunissamilu aarlerinartorsiorsinnaaneq paasissutissiissutigineqassapput, tamatumani Kalaallit Nunaat nunanit allanit immikkooruteqarmat, coronamik suliaqartunit nalunaarummi oqaatigineqarpoq.