Upernaakkut ataatsimiinneq: Demokraatit siunnersuuteqarnianngillat
Inatsisartut upernaakkut ataatsimiinnissaanni paartimit illuatungiliuttunit Demokraatinit aalajangiussassatut siunnersuuteqartoqanngilaq.
Siunnersuutit qularnanngitsumik peerneqarnissaat akuerineqaraluarpata akuerineqanngikkaluarpataluunniit matumani pissutaavoq. Ukioq qinersiffiunera tamatumunnga nassuiaatissaavoq.
Apeqquteqaatit aallaavigalugit oqallinnissamut siunnersuutit
- Qinersinissaq suaarutigineqartillugu aalajangiiffigisassatut siunnersuutit tamarmik naammassillugit suliarineqarsimanngitsut atorunnaarsinneqartarput. Qinersisussaagattalu kingusinnerpaamik 2018-mi novemberimi taava Naalakkersuisut aalajangiiffigisassatut siunnersuutinik Upernaakkut Ataatsimiinnissami aallartilersumi akuerineqarumaartussanik piviusunngortitsisinnaasussaanngillat, Demokraatit siulittaasuat Randi Vestergaard Evaldsen oqarpoq.
Taarsiullugu partii Inatsisartuni apeqquteqaat aallaavigalugu Inatsisartuni oqallinnissamut arfineq-marlunnik siunnersuusiorsimavoq.
Pisortat ingerlatseqatigiiffiisa allattugaataanik innuttaasut piniarsinnaalersinnissaat anguniarlugu, Pisortat ingerlatsinerat pillugu paasitinneqarsinnaatitaanermut inatsisartut inatsisaat allanngortittariaqarnersoq pillugu, Justus Hansenip oqallittoqarnissaa kissaatigaa. Aammattaaq ‘’kiffartuussinermut isumaqatigiissutit aqqutigalugit inunnut illoqarfissuit avataaniittunut timmisartumut bilitsit akikinnerusut qanoq iliorluta qulakkeersinnaaneri’’ pillugit oqallitsitsiniarpoq.
Inunnut ulorianartumik pinerluttarnerup qanoq iliorluni millisarneqarneqarsinnaanera pillugu aamma oqallitsitserusuppoq, tamanna politiit ukiumut nalunaarusiaat naapertorlugu qaffariangaatsiarsimammat.
Hash inerteqqutaajunnaarsinneqassava?
Nivi Olsenip hash/cannabisip inerteqqutaajunnaarnissaa oqallisigisassanngorsimavaa. Tamanut ammaanneqassagaluarpat iluaqutissartai akorngutissartaasalu kiisalu Namminersorlutik Oqartussat nakkutigisaasumik ikiaroornartumik nioqquteqartalersinnaanera tassanngaanniillu isertitat tamarmik atornerluisunik katsorsaasalernissamut atorneqartalernissaat pillugit apeqquteqaat allaavigalugu oqallinnissamik siunnersuuteqarluni.Ilaqutariit nukittorsarumallugit ilaqutariinnik coachiisalernissaq Nivi Olsenip oqallisigisassanngortippaa.
Partiimi siulittaasoq apeqquteqaat aallaavigalugu oqallisigisassanik marlunnik siunnersuuteqarpoq. Aappaa inunnik perulunnertik aamma ikiorneqarsinnaajunnaarnertik pissutigalugu toquinnarusullutik kissaateqartunut ikiuineq naalagaaffittut qanoq isummerfigissallugu kissaateqarnitsinnut tunngavoq. Aappaalu 17-nik ukiulinnut biilernermut allagartamik misiliutigalugu tunniussisarnissamut tunngavoq. Tamanna pillugu nalunaarut 2017-mi januarip ulluisa aallaqqaataani Danmarkimi atuutilersoq nunatsinni akuerissaneripput apeqqutaavoq.