Upernaakkut ataatsimiinnissaq taamaatinneqarpoq
Inatsisartut tallimanngorpat sivikitsunnguamik naapissapput, ulloq qinersiffissaq akuerissallugu.
Inatsisartut upernaakkut ataatsimiinnissaat tallimanngorpat apriilip 17-ianni aallartittussaagaluartoq taamaatinneqarpoq juunip 2-anni inatsisartunut qinersisoqarnissaa pissutigalugu.
Taarsiullugu inatsisartunut ilaasortat tallimanngorpat sivikitsunnguamik naapissapput, juunip 2-anni qinersinissamik siunnersuut, naalakkersuisooqatigiinnit Siumumit Atassummillu saqqummiunneqartussaq aalajangiiffigissallugu.
Ukioq manna inatsisartunut pinngitsoorani qinersisoqartussaavoq, kingusinnerpaamik novembarip 15-ianni. Tamannali qaammatinik sisamanik sioqqullugu pisussaatillugu immikkut ittumik qinersinerussaaq, taavalu inatsisartut akuersisariqarput, Hans Enoksen oqarpoq.
Marloriarluta taasissaagut
Inatsisartunut juunip 2-anni qinersinissaq inatsisillu tunngaviusut allannguutissaanik juunip 7-ianni taasisinissaq ataatsikuungajassapput. Ulloq taanna, sapaammi, qinersisartut taasissutigissavaat kunngissap angutaasariaqarneranik aalajangersagaq allanngortinneqassanersoq.
Naalakkersuisut siulittaasuata kissaatiginartinngilaa inatsisartunut qinersinerup allalu pillugu taasinerup ataatsikkoortinnissaat.
- Immaqa pisarissersuutaannginngerussagaluartoq inatsisartunut qinersineq taasinermit allamit akornusersorneqarnissaa kissaatiginngilara, Hans Enoksen sermitsiaq.gl.-imut oqarpoq.