Upperisarsiornikkut peqatigiiffik nutaamik initaarpoq
Upernaamut pilersaarut ilisimatusarfimmi Ilimmarfimmi sisamanngorpat aallartinneqassaaq.
Upperisarsiornermi Peqatigiiffik Kalaallit Nunaata ilisimatusarfia Ilisimatusarfik peqatigalugu Nuussuarmi ilisimatusarfimmut Ilimmarfimmut nuuppoq, tassani auditoriumi nutaaliaq nutaaq peqatigiiffiup siunissami ataatsimiittarnissaani avatangiisiisuussaaq.
Peqatigiiffiup siulittaasua rektor dr.theol. Aage Rydstrøm-Poulsen ilisimatitsivoq.
– Upperisarsiornikkut Peqatigiiffimmi - maanna ukiut sisamassaa ingerlasumut - ataatsimiittarnernut tikilluaqqusinissamut assut qilanaarpugut, siulittaasoq oqarpoq.
Unnussiorneq siulleq pissaaq sisamanngorneq februaarip 21-ianni nal. 19:30. Tassani upperisarsiornermut ilisimatusarfimmi pisortanngorlaap ph.d. Flemming A.J. Nielsenip »Esajap Atuagaa aamma kristumiussutsip pinngornera« oqaluttuarissavaa.
Ilisimatuunngorniarfiup pisortaa Flemming Nielsen oqalugiaatissani pillugu oqarpoq:
– Kristumiut biibiliat atuakkanik pisoqarujussuarnik 66-inik allagaatinillu annertunngitsunik imaqarpoq, ukiut immaqa 1000-it ingerlaneranni pileriartorsimasoq; atuakkami katersat allagaatit nutaanersaat ukiut 1800-t siierlugit pisoqaassuseqarput.
– Atuakkat annersaasa paasiuminaanersaasalu ilagaat Esajap Atuagaa; Atuagaq profetip allagaanik taaneqartarpoq. Profet-imit allakkat takornarnartorujussuuvoq ullutsinnilu atuartartunut paasiuminaassinnaalluni, taamaakkaluartoq atuakkat taamaattut kristumiussutsip pileqqaarneranut upperisarsioqatigiillut kristumiut ineriartornerannut tunngatillugu ingasattajaakkatut taaneqarsinnaagunanngillat.
– Testamentitaamik Jesusi pillugu allakkat ilarujussui allakkanit profetit atuakkiarisartagaanni nassaassaasunit aallaaveqarput, minnerungitsumik Esajap Atuagaani; Atuagaq Testamentitaamit pisoqaanerujussuaq.
Oqalugiareernerup - tamanut ammasup - kingorna unnuk taanna sammineqartoq pillugu apeqquteqartoqarsinnaallunilu oqallinneqassaaq.