Ups: Islandimiut naatsorsuinermit 14.000-inik ikinnerupput
Islandimi oqartussat naatsorsuisarsimanerannit Islandimi innuttaasut 14.000-inik ikinnerupput.
Islandimi naalakkersuisut ataasinngornermi nalunaarutigaat kisitsisitigut allaffissornikkut kisitsisit nuna tamakkerlugu innuttaasunik nalunaarsuisarfimmit kisitsisit tunngavigalugit suliarineqarsimasut, kisitsisilli taakku eqqoqqissaanngillat.
Islandimi Naatsorsueqqissaartarfiup maannamut nalunaarsukkani nuna tamakkerlugu nalunaarsugaasivik tunngavigalugu innuttaasut naatsorsortarai, Islandimi tusagassiorfik Iceland Review allappoq.
Islandimi naalakkersuisut oqarput nalunaarsuiffimmi ilanngunnissaq kajumissaarutigineqangaatsiartoq, qeqertamiilli nuunnerup kingorna pissutsit nalunaarsuiffimmi ilaajunnaarnissamut nalunaarnissaq eqqaamaneqanngitsoortartoq.
Nuunnermi nalunaaruteqanngitsoortartut
Tamanna pissutigalugu inuit tusindilikkuutaat Islandimi najugaqarunnaaraluarlutik suli Islandimi innuttaasutut naatsorsorneqartarput, Islandimi tusagassiorfik, Islandimi naalakkersuisut nalunaarutaat tunngavigalugu allappoq.
Kukkunerup paasineqarnerata kingorna Islandimi Naatsorsueqqissaartarfiup innuttaasunik kisitsisoqaraangat paasissutissat arlallit atortalerpai.
Aviisimi Iceland Review-imi allassimavoq nutaarsiassaq nuannersoq tassaasoq Islandip aningaasaqarnera siornatigut nalunaarutigineqartumit ingerlalluarnerusoq, tassami inuit 14.000-inik ikinnerunerat nunap aningaasartuutaanik naatsorsuinermi iluaqutaasumik sunniuteqartoq.