Ups: Meerartaarsinnaanngitsut IVF-mik suliaritinnissaannut siunnersuut kukkusoqarneratigut peerneqarsimasoq
Meerartaarsinnaanngitsut IVF-imik suliaritinnerat, suliaritikkiartorlutik angalanerat ineqarnerallu akilerneqartalernissaannut siunnersuut, kukkunikkut peerneqarsimavoq. Siumutgruppimi siulittaasoq taama ilisimatitsivoq.
Siumut Inatsisartuni gruppiata siunnersuutaa, nammineq pisuussutiginagu meerartaarsinnaanngitsut IVF atorlugu suliaritinneranni, suliaritinnermut angalanermut najugaqarnermullu aningaasartuutit matussuserneqartalernissaannut Naalakkersuisunut peqqusinerat peerneqarsimavoq. Taamaasiornerli kukkuluttorneruvoq. Inatsisartuni Siumut gruppiani siulittaasoq, Doris J. Jensen qularnaveeqqusiivoq.
Siunnersuut 2019-imi ukiakkut siullermeerneqarluni oqaluuserineqarpoq. Piffissaalatsinerli pissutigalugu siunnersuut Inatsisartut upernaakkut 2020-mi ataatsimiissutigisussanngorlugu kinguartikkaat, taamani gruppimi siulittaasoq, Karl Kristian Kruse nassuiaateqarpoq.
Coronalli ajornartoortitsinera pissutigalugu Inatsisartut upernaakkut nalinginnaanngitsumik ataatsimiipput.
Siunnersuulli aappassaaneerneqartussatut piareersimasoq, ukiakkut ataatsimiinnermi oqaluuserisassanut ilanngunneqarsimanngilaq.
- Siunnersuutip tunuartinneqarsimasutut nalunaaqutserneqarsimanera kukkuluttorneruvoq. Soorunami kinguartinneqarnikuuvoq, tunuartinneqarani. Paatsooqatigiinnikkut tunuartinneqartoorsimavoq, Doris J. Jensen Sermitsiaq.AG-mut nassuiaavoq.
Taanna nassuiaavoq pisut assigiinngitsut pissutigalugit immikkoortoq 216 "Tunuartippoq"-mik allaqqalersimasoq.
Siunnersuuteqartoq ”soraarpoq”
Inatsisartuni ilaasortaasimasoq Laura Taunajik Uitsatikitseq siunnersuuteqaqqaartuuvoq. Taannali Inatsisartunit sulinngiffeqalerpoq, maannalu politikkimik suliaqarani.
Siunnersuuteqartoq sulinngiffeqalermat Siumut gruppia siunnersuuteqartutut allaqqalersinneqarpoq. Laura Taunajik Uitsatikitserli Inatsisartuni ilaasortaajunnaarmat siunnersuut aamma peerneqaannarsimavoq.
- Siumumi suli sulissutigissavarput rigshospitalimi IVF-imik katsorsartinnissamut aningaasartuutit akilerneqartalernissaat, Doris J. Jensen oqarpoq.
- Inatsisartoqarfimmi siulittaasoqarfik oqaloqatigaara. Immikkoortorlu Inatsisartuni oqaluuserisassatut inisseqqinniarneqartoq taakku uppernarsarpaat, Doris J. Jensen qularnaveeqqusiivoq.
December 2018-imili aappariit nammineq pisuussutiginngisaminnik meerartaarsinnaanngitsut Danmarkimut nakorsiartinneqartarnerat passunneqartarnerallu aningaasalersorneqarunnaavippoq. Meerartaarsinnaannginneq pissutigalugu Danmarkimut suliarikkiartortariaqartut namminneerlutik maanna tamakkiisumik akiliisarput.