Uran naalakkersuisooqatigiit isasoorutigisinnaavaat: Siumut piareersimavoq ingerlanissaminut - IA nikeriarumassanngippat
Pingasunngornerup ualiani Erik Jensen (S) partiimilu siulittaasoqatini Múte Bourup Egede (IA) naapeqatigiipput. Taakku peqatigiillutik qinigaaffiup sinnerani naalakkersuisooqatigiit politikkikkut anguniagassaat nalilersortussaagamikkit.
Tallimanngornermi Inatsisartut ukiakkut ataatsimiillutik aallartissapput. Ataatsimiinneq sivikitsuaraasinnaavoq, Siumut aamma Inuit Ataqatigiit qinigaaffiup sinnerani 2025-ip tungaanut politikkikkut anguniagassat tulleriaarneqarnerat pillugu isumaqatigiissinnaassanngippata.
Sermitsiaq.AG-mit Erik Jensen pingasunngornermi Kangerlussuarmiit Nuummut apuuteqqammertoq aammalu Múte Bourup Egede-mik ataatsimeeqatiginninngilaatsiarnerani iluatsipparput. Erik Jensen itisilikkanik oqaaseqarumanngikkallarpoq Naalakkersuisooqatiminnut piumasaqaatiminnik politikkikkullu pinasuartumik aallartikkusutatik pillugit saqqummiussisimatinnani:
- Soorunami partiip siulittaasuatut pisussaaffigaara ataatsimeersuarnitsinni anguniagassatut aalajangersarneqarsimasut malitseqartissallugit, taakkunannnga ilai pilertortumik suliassaapput, taamaammallu naalakkersuisooqatigiit suleqatigiinnissamut isumaqatigiissutaanut ilannguttariaqartutut isigisassaapput. Ilaatigut matumani pineqarput aatsitassarsiornermut politikki, akileraartarnermut politikki, nunatta naligiinnerusumik ineriartortinneqarnissaanut politikki aammalu minnerunngitsumik naalagaaffinngornissamut tunngatillugu politikki, taamak Sermitsiaq.AG-mut erseqqissaavoq Siumup siulittaasua, Erik Jensen.
Kuannersuit eqqissisitaavoq - aatsitassalli uranitallit inuilaarsuarmiittut periarfissatut isigisaapput
Suliassat nutaat amerlanersaat illuatungeriit naapiffeqarfigisinnaassagaat ilimagissallugu pissutissaqarpoq, aatsitassarsiornermulli tunngatillugu akerlerissutit avissaarutaasinnaanerat aarlerinaateqartutut suli inissisimavoq. Aatsitassarsiornermulli tunngatillu isumaqatigiissinnaassanngikkunik Jensen kingunissaanik tigusinissaminut piareersimanerarpoq.
- Sapinngisamik maanaannaq qinersinerit pinngitsoortinniagassaraagut, tamattami nalunngilarput maanaannaq qinersisoqartillugu patajaassuseq innarlerneqartartoq aammalu suliat ingerlasut maanaannaq akisoqisumik unitsinneqartartut, taamaammat neriuppunga soorunami suleqatigiinnerput pitsaasoq tatigeqatigiinnermillu aallaavilik ingerlaannarsinnaajumaartoq, aamma uagut ataatsimeersuarnitta malitsigisaanik politikkikkut nutaanik siunnerfeqaleraluaruttaluunniit.
Taannali erseqqissaavoq pimasatik naammaginartumik pinngikkunikkit naalakkersuisooqatigiinnit qimagussinnaallutik.
- Taamaattorli sunaluunniit akigalugu maanaannaq qinersineq avaqqunniarsarinavianngilarput. Anguniagaqarpugut suliarerusutatsinnik, anguniakkavullu IA-mit akueriumaneqassanngippata, naggaterpiaatigut naalakkersuisooqatigiinni ingerlariaqqissinnaajunnaarneq killiffigisinnaavarput, tamannalu sillimaffigaarput, Erik Jensen Sermitsiaq.AG-mut oqarpoq.
Uran pillugu inatsit allanngortikkusuppaat
Naalakkersuisooqatigiit aporaassutigilersinnaasaattut Erik Jensen assersuuteqarpoq partii Siumut IA-mut qanillattuuteqarsimasoq Uran pillugu apeqqummi.
- Isumaqatigiissutigaarput aatsitassarsiorneq inoqarfinni qanittumiittuni ingalassimaneqassasoq, assersuutigiinnarlugu Kuannersuarni aatsitassat qaqutigoortut piiarneqassanngitsut isumaqatigiippugut. Taamaattorli aatsitassarsiorneq inuussutissarsiutitut annertuumik ingerlanneqartutut inississasoq uagut tamaviaarupparput, isumaqarpugullu naapiffigisinnaasatsinnik uranitalinnik piiaasoqarsinnaanissaanut tunngavissiisinnaalluta, Erik Jensen oqarpoq nangillunilu:
- Siumumiit isumaqarpugut naapiffigisinnaasarput tassaasoq aatsitassat uranitallit inuilaarsuarmiittullu qallorneqarnissaat siunnerfigineqarsinnaasoq, tassa nunaminertani inoqarfiunngitsuni uumasuuteqarnermillu ingerlatsiviunngitsuni taamatut aatsitassarsiorluartoqarsinnaasoq, Erik Jensen Sermitsiaq.AG-mut nassuiaavoq.
Naalagaaffinngornissamut naalakkersuisoq
Siumup ataatsimeersuarnerani, aalajangikkat ilagaat naalagaaffinngornissamut naalakkersuisoqarfimmik "piaartumik" pilersitsisoqassasoq, tamannalu pillugu Erik Jensen Múte Bourup Egedemut qaqitsiniarpoq:
- Politikkikkut annertuunik imaannaanngitsunillu suliassaqarpugut naalagaaffinngornissamut tunngatillugu. Ilaatigut oqartussaaffiit Naalagaaffiup nunarput sinnerlugu ingerlataasa nunatsinnit tiguneqarnissaannut tunngassuteqartut, ilaatigullu naalagaaffinngoriartuaarnermi innuttaasut qanimut suleqatiginissaannut tunngassuteqartut suliassaapput pingaarutillit. Tassunga tunngatillugu isumaqarpugut Naalakkersuisumik nutaamik naalakkersuisoqarfissaanillu ivertitsinissaq pissusissamisoortoq, Erik Jensen oqarpoq.