urani pillugu oqallinneq
Uranimut naaggaarneq IA-p aalajangiusimavaa
– Atortussiassanik radiop qinngornerinik ulorianartunik akulinnik piiaanissamik aalajangiinermi innuttaasut peqataatinneqarnissaannut Nunavut ilinniarfigisinnaaqaarput, IA-p siulittaasua Sara Olsvig erseqqissaavoq
Uranimik piiaanermi innuttaasut akulerutsinnissaannut Kalaallit Nunaata assersuutigalugu Nunavut ilinniarfigisinnaasorujussuuvaa.
Taamatut erseqqissaavoq Inuit Ataqatigiit siulittaasuat Sara Olsvig, partiip arfininngormat Narsami urani pillugu isumasioqatigiinnerani.
Impact Review Board
Tassani Hilu Tagoona aamma Jack Hicks, Nunavummi Nunavummiut Makituganarningit-meersut saqqummiussipput, tassanilu immikkut ingerlatsivimmit Impact Review Boardimit misilittakkat tikkuarpaat.
Impact Review Board tassaavoq innuttaasut suliniaqatigiiffiat arlaannut attuumassuteqanngitsoq, taannalu Nunavummi inatsisartunut naalakkersuisunullu inassuteqartarpoq, assersuutigalugu piiaaffimmik ingerlatsinermut - aalajangeeriaaserlu tamanna Kalaallit Nunaata ilinniarfigisinnaaqaa, Sara Olsvig isumaqarpoq.
Naggueqatit
– Nunavummi naggueqativut attaveqarfiginerussavagut, aamma urani pineqaraangat. Pissutsinik taamaafttunik atuisuni kisiartaanngilagut. Nunavummili uranisiornissamut pilersaarutit arlallit unitsinneqarsinnaasarsimapput. Nunavummi aalajangeeriaaseq tamanna ilinniarfiginiartigu, Sara Olsvig tusagassiorfinnut nalunaarutikkut erseqqissaavoq.
Peqqissutsimut kinguneqaatit
Australiamit Canadamillu aamma nakorsat kattuffiinit peqataasoqarpoq. IA-llu siulittaasua isumaqarpoq uranimik piiaanermut atatillugu peqqissutsimut kinguneqaatit sammineqarnissaat pingaaruteqartoq - assersuutigalugu avatangiisinut sunniuteqaatissaata saniatigut.
Periarfissat allat
Paasiniaaqatigiinnermi peqataasut Kujataani inuussutissarsiutit allat ineriartortinnissaat ujartorpaat - uranimik piiaasoqanngikkaluarluni nunap immikkoortuani tassani siuariartortoqaqqullugu. Assersuutigalugu nunalerinerup, uumasuuteqarnerup, savaateqarnerup, takornariaqarnerup, eqqumiitsulianik ingerlatsiviit aalisarnerullu ineriartortinneqarnissaat.
Utaqqiinnarani
– Pisariaqarpoq inuussutissarsiutit allat ineriartortinnissaat siuariartornissarlu qulakkeerlugu. Utaqqiinnarunnaassaagut. Ilumut uranimik piiaaffik ammarneqassanersoq neriorsuisoqarsinnaanngilaq. Akisussaassusilimmillu iliuuseqarnissaq tassatuaavoq uranip kisimi isiginiarneqannginnissaa, aammattaarli sukkasuumik allanik ineriartortitsinissaq. Inuit Ataqatigiit tamanna aqqutissiuunniarpaat, Sara Olsvig erseqqissaavoq.
Naaggaarneq aalajangiusimavaat
Paasiniaaqatigiinnermi tamatuma saniatigut Inuit Ataqatigiit erseqqissarpaat partiip uranimik piiaanissamut akerliunini aalajangiusimagaa, sulilu sulissutigalugu tamassuma nuna tamakkerlugu taasissutigitinneqarnissaa.