USA Kalaallit Nunaanni isumassarsianik ineriartortitsinissamut 450.000 dollarsinik tapiissuteqarsimasoq
Fonden for Entreprenørskab Kalaallit Nunaat USAID-ilu suleqatigiinnissamik isumaqatigiissuteqarsimapput, USAID ukiut marluk ingerlaneranni tapiissuteqartassalluni.
Isumassarsianik ineriartortitsinissamut nutaaliornissamullu ilinniartitsisarneq ukiut marluk tulliuttut ingerlaneranni annertuumik kivinneqarsinnaavoq. USAID-imi Fonden for Entreprenørskab Kalaallit Nunaata suliaqarnissaanut 450.000 dollarsinik - 2,8 millioner koruunit missaannik - tapiissuteqarsimavoq.
Tapiissutigineqartut Kalaallit Nunaanni meeqqat atuarfiini, inuusuttut ilinniarfiini ingerlaqqiffiusumillu ilinniarfinni isumassarsianik ineriartortitsisarnerup nutaaliornerullu siammarterneqarnissaanut atorneqassapput, aningaasaateqarfik tusagassiorfinnut nalunaaruteqarluni allappoq.
USAID tassaavoq USA-mi ineriartortitsinermut suliffeqarfik, amerikamiut nunani allani ineriartortitsinermut aningaasaliissuteqarfigisartagaat.
Siulittaasoq sulinissamut qilanaartoq
Taakku marluullutik isumaqatigiissutaat septembarip 17-ani Ilulissani Jørgen Brønlungip Atuarfiani atsiorneqassaaq, aningaasaateqarfimmilu siulitaasup Jacob Nitter Sørensenip isumaqatigiissuteqarneq nuannaarutigaa:
- Ilinniartitsisut atuartullu nutaaliorluni aallarnisaanermik sammisaqaraangamik soqutiginninnerat nuannertorujussuusarpoq takullugu. Sammisaq atuartunut ataasiakkaanut allanngueqataasarpoq, allanngueqataanerlu siunissami inuiaqatigiinnut suliffeqarfinnullu sunniuteqartussaaavoq..
- USAID-illu suleqatigilerneratigut suli siammasinnerusumik ilinniartitsisorisagut immikkoortortaqarfimmilu aqutsisorput Mette Steensholdt peqatigalugit suliaqarsinnaalissaagut, Fonden for Entreprenørskab Kalaallit Nunaanni siulittaasoq Jacob Nitter Sørensen oqarpoq.
2020-mi tapiissuteqarnissamik isumaqatigiissuteqarsimaneq
USA ukiuni kingullerni Kalaallit Nunaannut atatillugu soqutiginnikkiartuinnalersimavoq. 2020-mi apriilip qaammataani Naalakkersuisut nalunaarutitaat, USA-p tapiissuteqarnissaanut akuersaarsimallutik. USA-p Kalaallit Nunaanni suliniutinut 12 millioner dollarsit tapiissutissatut immikkoortissimavai, tapiissutillu ilaatigut ilinniartitaanerup iluani atugassatut aalajangiunneqarsimallutik, taamanikkut Naalakkersuisut ilisimatitsipput.
Aningaasaateqarfiup pappialaataani takuneqarsinnaanngilaq, USAID-imit tapiissutit Naalakkersuisut Amerikamilu naalakkersuisut isumaqatigiissutaannit toqqaannartumik tunngaveqarnersut.