USA-mit oqariartuut
Pituffimmi sulisuusimasumit isumaliutersuut asseqanngitsoq, naak taama atorfeqarsimasut politikikkut isummaminnik saqqummiussisanngikkaluartut.
Aviisip Sermitsiap Pituffik Space Basemi atorfeqarsimasup isumaliutersuutaa sapaatip akunnerani matumani saqqummersup ilannguppaa.
Sulisuusimaup Nunatta namminiilivinnissaa tapersersorpaa, aamma periaatsinut illersornissamullu politikimut tunngasut misissoqqissaarsimallugit.
Isumaliutersuut asseqanngilaq. Aatsaammi siullerpaamik Amerikamiumik Pituffimmi atorfeqarsimasumik Nunatsinni aviisimut isummersortoqarpoq.
Silarsuaq politikerfiunngitsoq
Amerikamiut sakkutuui nalinginnaasumik politikikkut isummersorneq ajorput, taamalu isummaminnik avammut saqqummiussineq ajorlutik. Aviisimi matumani Pituffimmi sulisunik Nunatsinni pissutsinut tunngasunik oqaaseqartitsiniartaraluarpugut. Tamatigulli iluatsitsissanata. Dakessianimulli atatillugu sakkutuut qullersaannut ilaasimasumit isummanik annissuiffigineqarpugut, taassumami isummani ammasumik tamanut saqqummiuppai.
Sulisuusimasoq master of sciencetut (Danmarkimi civilingeniøritut assingusumik, aaqq.) avataarsualerinermi teknologimik, Californiami San Diego State Universitymi ilinniagaqarsimavoq. Amerikami sakkutuunut timmisartortartunut 2013-imit 2022-mut atorfeqarsimavoq. Ukiuni 2020-mi 2021-milu Pituffik Space Basemi atorfeqarpoq, tamatumani sakkutooqarfiup aserfallatsaalineqarnissaanut isumaqatigiissummik aqutsisuulluni.
Taanna sakkutuujujunnaareerpoq, maannalu USA-p kujaterpiaani illoqarfimmi Las Crucesimi New Mexico State Universitymi allamik masterinngorniuteqarluni.
Isumaliutissiissutaa tuluttut allagaasoq aaqqissuunneqarlunilu qallunaatuumut nutserneqarpoq, tamatumalu kingorna Sermitsiamit kalaallisuunngortinneqarluni. Sulisuusimasoq Pituffimmi atorfeqarnermini qallunaat oqaasiinik atuartinneqartarpoq, allaaserisamilu qallunaatuunngortinneqarnera akuerimallugu.
Aviisimi Sermitsiami isumaliutersuut tamaat atuarsinnaavat. Aviisi uani pissarsiariuk:
