USA nannut pillugit kinguarsaavoq
Issittup nanuisa nunarsuup kissatsikkiartorneranit nungutaanissamut navianartorsiortinneqarnersut pillugu USA-p isummernissaq kinguartissimavaa. USA isumaqarpoq aalajangertoqartinnagu piffisaqarnerusariaqartoq paasissutissanik annertunerusunik atorfissaqartitsisoqartoq.
Taamaakkaluartoq avatangiisinik illersuiniaqatigiit sukkanerusumik iliuuseqartitsinissamut nukingisaariniarput.
Issittup nanuisa nersutinut nungutaanissamut navianartorsiortinneqartunut ilanngunneqarnissaannut aalajangernissamut piffissaliussaq pingasunngorpat pisussaagaluarpoq. Kisianni aalajangernissaq maanna qaammammik ataatsimik kinguartinneqarpoq.
Uumasoqatigiit nunarsuup kissatsikkiartorneranit nungutaanissamut navianartorsiortinneqarnersut pillugit USA aataavissuaq aalajangiisussaavoq. Tamanna oqartussaasut naapertorlugit aalajangiinniarnermut pisariunerulersitsisimavoq.
Issittup nanuisa puisinniarnerminni immap sikua angallavissatut pisariaqartippaa. Sikoqartinnagu nannut nunamiunngortariaqalersinnaapput, tamaanilu imaanitulli piniallaqqitsiginatik. Sikup aakkiartornera ilutigalugu nannut nunamiit ungasinnerujartuinnartumiit piniarniartariaqalissapput.