USA-p nunanut allanut tunngasunut ministeriata Nuummukarnissani taamaatippaa

Amerikamiut nunanut allanut tunngasunut ministeriata Mike Pompeop Nuummut angalanissani taamaatippaa, Namminersorlutik Oqartussani Periaasissanik aqutsisuuneq Jakob Rohmann KNR-imut taama ilisimatitsivoq.

Tikeraarnerup sooq taamaatinneqarnera ilisimatitsissutigisinnaanngilaa.

Mike Pompeo ataasinngormat aamma marlunngormat Issittumi Siunnersuisoqatigiit naalakkersuisunut ataatsimiititsinerani Finlandimiippoq, tamatuma kingorna Berlinimut aamma Londonimut kingornalu Nuummut tikeraartussaagaluarpoq.

Berlinimut tikeraarnissani taamaateriasaarpaa, tamatumunngalu taarsiullugu amerikamiut sakkutuui Irakimut tikeraariartorpai. Ullumikkut taanna Londonimiippoq, tassanilu premierministeri Theresa May ataatsimeeqatigaa.

Amerikamiut nunanut allanut tunngasunut ministeriisa sisamassaani Kalaallit Nunaat tikeraartussaagaluarpaa. Siornatigut Colin Powell, Hillary Clinton aamma John Kerry nunarsuarmi qeqertat annersaat tikeraarnikuuaat.

Nuummi politiit ulluni kingullerni ingerlatsinissamut sungiusarsimasut maanna eqqissisimaarsinnaapput, aamma sisamanngornermi ullaakkut aqqusinermi assersuinissamit sunnerneqassanngillat.

Mike Pompeop nunanut allanut tunngasunut naalakkersuisut marluk Anders Samuelsen aamma Ane Lone Bagger sillimaniarnermut politikki pillugu ataatsimiinnermi oqaluuserineqarnissaat naatsorsuutigineqaraluarpoq.

Anders Samuelsen Finlandimi Sermitsiaq.AG-mut ilisimatitsivoq, Mike Pompeop ataatsimeeqatiginissaanut ”oqaloqatigiinnissaq” aalajangersimasumik inerneqanngitsumik naatsorsuuteqarfigalugu.