Kommunini naligiissaarineq
Utaqqiisaasumik naligiissaarinermut aaqqiissuusseqqinneq akuersissutigineqangajalerpoq
Politikkikkut oqartussaasut naligiissaarinermut aaqqissuusseqqinneq akuersissutigissavaat oqarasuaatitigut oqaloqatigiinnermi ataasinngorpat
- Naligiissaarisarneq ataatsimoortumillu tapiissutit pillugit periusissaq nutaaq 2015-imi atuuttussaq, aammalu 2016 aallarnerfigalugu periusissamik ataavarnerusumik peqalernissaq siunertaralugu paasissutissatigut tunngavissarissaarnerulernissamut piareersarnissaq ullumikkut tunngaviusumik isumaqatigiissutigaavut.
Aningaasaqarnermut nunamullu namminermut naalakkersuisoq Vittus Qujaukitsoq Siumumeersoq nalunaaruteqarpoq.
Siunnersuut Ilulissani marlunngormat oqallisigineqarpoq, komunini sisamani borgmesterit Kanukokalu ataatsimeeqatigiillutik.
Utaqqiisaasumik naligiissaarisarneq ataatsimoortumillu tapiissutit pillugit periusissaq nutaaq, naligiissaarisarneq ataatsimoortumillu tapiissutit pillugit periusissamik nutaamik suliaqarnissami atorneqartussaq pillugu siunnersuusiortoqarnissaa borgmesterit, Kanukokap aammalu Aningaasaqarnermut Nunamullu Namminermut Naalakkersuisup Vittus Qujaukitsup isumaqatigigaat nalunaarutigineqarpoq.
Kisitsisit suli saqqummiunneqanngitsut
Naak Kanukokap siulittaasuata Martha Abelsenip Siumumeersup oqaatigigaluaraa 'Ataatsimoorluni aaqqiissuteqarumassuseq ataatsimiinnermi takutinneqartoq' nalunaarutigineqaraluartoq, suli isummerfigisassamut inaarutit naammassineqanngillat.
Sermitsiaq.AG-ip Kommuneqarfik Sermersuumi borgmesteri Asii Chemnitz Narup Inuit Ataqatigiinneersoq saaffigigaluarpaa oqaaseqartinniarlugu isumaqatigiissutigineqarsimasoq qanoq isummerfigineraa. Kisitsisinilli saqqummiussisoqarsimannginnera pissutigalugu suli qanoq isumaqarfiginerlugu suli aalajangiusimanani oqarpoq.
Politikkikkut oqartussaasut naligiissaarinermut aaqqissuusseqqinneq akuersissutigissavaat oqarasuaatitigut oqaloqatigiinnermi ataasinngorpat aggustip aqqarngani.