Utoqqaat Illersuisuat Narsamiit sulissaaq

Borgmesteriusimasumik Kiista P. Isaksenimik Utoqqarnut illersuisutut toqqaasimanerminnik, oktobarip aallartinnerani Naalakkersuisut nalunaaruteqarput.

Maanna Utoqqaat illersuisuata allattoqarfianit nalunaarutigineqarpoq Kiista P. Isaksen Narsamiit sulissasoq, tamatumunngalu atatillugu utoqqarnut Utoqqaat Illersuisuannik oqaloqateqarusuttunut ininik ataatsimiinnermilu atortunik utoqqarnut pisariillisaataajumaartussanik nunatsinni kommunit periarfisseeqqullugit kajumissaarpai.

- Nunami isorartoorujussuarmi najugaqarpugut, uangalu Utoqqaat Illersuisuattut nunatsinni utoqqaat qanimut attaviginiassallugit periarfissaqanngilanga.

- Taamaammat ininik ataatsimiinnermilu atortunik utoqqarnut Utoqqaat oqaaseqartartuannik sulisuinilluunniit oqaloqateqarusuttunut kommunit periarfissiissuteqaqqullugit kajumissaaruteqarpunga, Kiista P. Isaksen, tusagassiuutinut nalunaarummi oqarpoq.

Sulisuni Nuummiittut Teamsikkut ataatsimeeqatigisarniarai

Kiista P. Isaksen ilisimatitsivortaaq, nammineq sulisuni Nuummiittut ulluinnarni oqarasuaatitigut isiginnaarutitigullu Narsamiit ataatsimeeqatigisarniarlugit.

Nammineq atortut taakku kommunimi qinikkatut ukiorpaalunni atorluarsimavai, aammalu ungasianiit aqutsinermi sungiusimallugit allappoq:

- Takorloorpara atortut taamaattut utoqqarnut Utoqqaat Illersuisuannik attaveqarusuttunut oqilisaataasorujussuussasut, taamaasillutalu immitsinnut ungasikkaluaqaluta immitsinnut isigiitigaluta oqaloqatigiinnissamut periarfissaqalissagaluaratta. Assersuutigalugu kommunimi innuttaasut sullissiviinit imaluunniit nunaqarfinni kommunip allaffiinit Teams-ikkut ataatsimiissutinik periarfissiisinnaapput, Utoqqaat Illersuisuat kajumissaarivoq.

Kiista P. Isaksenip Inga Egede Utoqqaat Illersuisuattut taarserpaa. Inga Egede illersuisutut ukioq manna juulimi taamaatippoq.