Utoqqaat illersuisuat: Utoqqaat inuunermi atugaat misissorneqassaaq
Kalaalimerngit akiisa nalimmassarneqarnissaat, puigortunngortut inuunerminni atugassarititaat pitsanngorsarneqarnissaat utoqqaallu pisinnaanerusut ineqarfiini akit assigiisaarnerunissaat utoqqarnit ukkatarineqarnerunissaat kissaatigineqarpoq. Utoqqaat illersuisuat Kattuffik Utoqqaat Nipaat ataatsimeersuarnerani peqataavoq.
Utoqqaat inuunerannut atugassarititaanut pitsanngorsaaniarluni utoqqaat illersuisuat maanna sulinissaminut aallartisaleruttorpoq. Kattuffik Utoqqaat Nipaat ataatsimeersuarnerani utoqqaat illersuisuat Inga Egede peqataavoq. Ataatsimeersuarneq Kangerlussuarmi decembarip aallartinnerani ingerlanneqarpoq.
- Suliakkiissutigineqartut tamaasa qulaajaavigissavakka, kisianni suliassanik tulleriiaarisariaqarama assersuutigalugu sineriammi illoqarfinni mikinerusuni utoqqaat illuini tarnimikkut innarluutillit, puigortunngornermik nappaatillit aamma utoqqaat ataatsimoortillugit ineqartinneqarnerat pillugu paasiniaallunga qulaajaassaanga, utoqqaat illersuisuat Inga Egede ataatsimeersuarnerup kingorna taama oqarpoq.
Utoqqaat kattuffianit aallartitatut peqataasut 19-iupput. Peqataasullu ilaatigut puigortunngortut pitsaanerusumik atugassaqartinneqalernissaat kiisalu puigortunngortut napparsimalerneranni siusinnerusukkut nappaataat suussusersineqartalernissaa kissaatigaat. Puigortunngortullu peqqinnissaqarfinni kommuninilu tamani inunnik isumaginnittoqarfinni puigortunngortunik sullissinerat pitsaanerusoq assigiinerusorlu kissaatigineqarpoq.
Taassuma saniatigut utoqqaliartornermi timip peqqissuutinnissaa peqqinnissarlu pingaaruteqartoq peqataasunit erseqqissaatigineqarpoq. Taamaammallu kalaalimerngit akimikkut utoqqarnut naleqqunnerusut utoqqarnut atuutsinneqartariaqalersut kissaatigineqarpoq.
- Kattuffik Utoqqaat Nipaata ilaasortaasa naapinnerani qulequttat qulaajaavigisariaqartutut oqaatigineqartut tamaasa pingaaruteqartutut nalilerpakka, aamma Utoqqaat Illersuisutut sulilerninni pingaartilluinnarlugit ingerlatissavakka. Suliakkiissutigineqartut suliarinerini Kattuffik Utoqqaat Nipaanni siulersuisut suleqatiginissaat qilanaaraara, Inga Egede oqarpoq.
Utoqqaat ineqarfii sullissisullu
Utoqqaat pisinnaanerusut ineqarfii assigiiaarnerusumik akeqalernissaat ataatsimeersuarnermi peqataasut erseqqissaatigaat.
- Inoqarfinnilu assigiinngitsuni utoqqaat illuini inissaaleqineq aamma iluarsiivigineqartariaqartutut oqariartuutigineqarportaaq, utoqqaat namminneq illuminniittut imminnut isumassorsinnaajunnaartut ikiortissaaruttarmata ilaallu angerlarsimaffeeruttarlutik, taama utoqqaat illersuisuat tusagassiuutinut nalunaarummini allappoq.
Kommunini utoqqarnut sullissisut utoqqaat akornanni akuunerulernissaat aamma kissaatigaat. Sullissisut utoqqaat peqatigiiffiini ataatsimoornerni ornittakkanilu akuunerunissaat kissaatigineqarpoq, taamaasiornermimmi utoqqaat inuuniarnermikkut atukkaminnik oqariartuutissanik kommunimi sullissisuminnut apuussinnaagamikkit.
Utoqqaat kattuffiat aningaasanut inatsimmiilertariaqarpoq
Utoqqaat ilaatigut aamma kattuffertik aningaasanut inatsimmiilernissaa kissaatigaat. Tips og Lotto-mummi qinnuteqartarneq pisariariusinnaasarput nukissaalatsiffiusinnaasarlutillu. Aningaasanut inatsimmiilersinnaaput angalanerit, pikkorissarnerit ataatsimeersuarnerillu.