Utoqqaat pillugit Kommune Kujallerlu isumaqatigiissuteqartut: Utoqqaat isiginnaarutitigut attaveqaatit atorlugit utoqqaat pillugit oqaaseqartartuat attavigisinnaalerpaat
Kommunimini utoqqaat utoqqaat pillugit oqaaseqartartumut atortorissaarutit atorlugit attaveqartalernissaannut Utoqqaat pillugit oqaaseqartartoq Kommune Kujallerlu suleqatigiinnissamik isumaqatigiissuteqarput.
Kommuni Kujallermi utoqqaat isiginnaarutikkut atortorissaarutit atorlugit utoqqaat pillugit oqaaseqartartuat attavigisinnaalerpaat.
Taamaasilluni Kommune Kujalleq utoqqaat pillugit oqaaseqartartup kommuninut kaammattuutaanut, tassa kommunit ininik attaveqatigiinnermilu atortunik utoqqarnut atugassiinissamut kaammattuutaanut kommuninit allanit siulliulluni periarfissiivoq.
- Nunarput angalaffigissallugu isorartoorujussuullunilu akisoorujuussuusinnaavoq, taamaammat Kommune Kujallermik suleqateqarnikkut utoqqaallu immitsinnut ungasikkaluarluta kiinnerluta attaveqarsinnaalernerput nuannaarutigeqaara, Utoqqaat pillugit oqaaseqartartoq Kiista P. Isaksen unnersiorpoq.
Oqaloqatigiinneq siulleq ataasinngorpat pissaaq
Attaveqatigiinneq siulleq Nanortalimmi, Narsami Qaqortumilu utoqqarnit peqataaffigineqartussaq ataasinngornermi februaarip tallimaani pissaaq.
- Siunertaavoq isiginnaarutit atorlugit utoqqarnik attaveqartarnerup kommuninut allanut aamma siaruaannissaa, utoqqaat pillugit oqaaseqartartoq Kiista P. Isaksen tusagassiuutitigut nalunaarutimini allappoq.
Utoqqaat pillugit oqaaseqartartup utoqqaallu ataatsimeeqatigiittarnissaannut Kommune Kujalleq ininik isiginnaarutitigullu ataatsimiissutinik periarfissiisassaaq, paarlattuanillu utoqqaat pillugit oqaaseqartartoq ataatsimiinnissanik pilersaarusiortartuullunilu ataatsimiinnerit inernerinik Kommmune Kujallermut ilisimatitsissuteqartassalluni.
Ataatsimeeqatigiinnerit nalunaaquttap akunnerini marlussunni sivisussuseqartartussat
aallaqqaammut upernaakkut ataasiarluni ukiakkullu ataasiarluni pisassapput.