Utoqqaat pillugit oqaaseqartartoq: Utoqqalinersiaqartitsisarneq ataqatigiinngilaq
Utoqqalinersiaqarnermut inatsimmi pilersuisussaatitaanermut tunngasoq 1. januar 2024 atorunnaarpoq, soraarninngorsimasunullu isertitaqarnerusunik aappaqartunut arlalinnut iluaqutaassalluni. Utoqqalinersiutisisareertulli arlallit maanna pisartagakinnerulissapput.
Utoqqaat pillugit oqaaseqartartoq ukiortaami suliartoqqaarami suliassanik allarluinnarnik suliassaqalerpoq.
- Utoqqalinersialik aappalik siornamut naleqqiullugu maanna 1.600 koruuninik
qaammammut ikinnerusunik utoqqalinersiaqartinneqalersimasoq ukiortaami sulileratta
ulloq siulleq uatsinnut saaffiginnippoq.
- Paasinarluinnartumik assut paatsuungavoq, isumaqarsimagaluarpormi pilersuisussaatitaanerup atorunnaarsinneqarneragut aningaasanik amerlanerusunik pisartagaqalissalluni, utoqqaat pillugit oqaaseqartartoq Kiista P. Isaksen tusagassiorfinnut nalunaaruteqarluni oqarpoq.
Utoqqalinersiaqartarnermi aappaasup aningaasarsiaqartuuguni pilersuisussaatitaanera 1. januar 2024 atorunnaarsinneqarpoq. Tamanna isumaqarpoq utoqqalinersiaqartut aapparisap isertitai apeqqutaatinnagu utoqqalinersiaqalissasut. Utoqqalinersiaqarnermili tapit utoqqalinersiaqartut ilaannut appariassallutik.
Kommunit arlallit saaffigineqartut
Avannaata Kommunia utoqqalinersiuteqartunit arlalinnit saaffigineqarsimalluni nalunaarsimavoq.
- Kommuninilu attavigisartakkannut sianeqattaarnerup ersersippaa, utoqqalinersialippassuit
ikinnerusunik utoqqalinersiaqartinneqalersimanertik pillugu kommuninut
saaffiginnittarsimasut. Naak pilersuisussaatitaanerup atorunnaarsinneqarneragut
utoqqalinersiallit pitsaanerusunik atugaqalernissaat neriorsuutaasimagaluartoq
ajornerusumik inuuniarnerminni atugaqalersinneqarnerat ernumanarpoq, utoqqaat pillugit oqaaseqartartoq oqarpoq.
Utoqqaat pillugit oqaaseqartartoq isumaqarpoq utoqqalinersiaqartut ilaat ikinnerusunik pisartagaqalerneranni kommunini isumaginninnerup iluani aningaasartuutit annertunerulernissaannut aarlerinartoqartoq.
Naak aningaasat
Isumaginninnermut Naalakkersuisoqarfik Sermitsiaq.AG-mut nassuiaateqarpoq inatsisip allanngortinneqarnerani utoqqalinersiuteqartut amerlanerpaat iluaqutissinneqartut. Utoqqalinersiuteqartulli ikinnerusut, sulisartumillu aappaqartut ilaat, isertitamikkut allannguuteqartumik malugisaqassapput.
Naalakkersuisoqarfik pissutsit nutaat pillugit tusagassiorfinnut nalunaaruteqarluni ima nassuiaavoq:
- (..) tamanna aamma isumaqarpoq, utoqqalinersiallit, aappaasup utoqqalinersiutinik pisartagaqannginnera pissutigalugu, siornatigut ”kisermaatut” isigineqartut, maannakkut utoqqalinersialittut aappaqartutut isigineqalissammata.
- Taamaalilluni tamanna isumaqarpoq, utoqqalinersiallit ilaat ”kisermaatut” isigineqartut aappaqartutut isigineqalissasut. Tamanna isumaqarpoq, utoqqalinersianut tapeq 85.642 kr-iniit 47.604 kr-inut ikileriassasut, Isumaginninnermut Naalakkersuisoqarfik tusagassiorfinnut nalunaaruteqarluni nassuiaateqarpoq.
Utoqqaat pillugit oqaaseqartartoq pissutsit nutaat paasiuminaatsippai:
- Pilersuisussaatitaanerup atorunnaarsinneqarneragut aappaasup isertitai pissutigalugit
utoqqalinersiaqartinneqartup utoqqalinersiai ilanngaavigineqartartussaajunnaarluarput.
Naak 16,8 millioner koruunit utoqqalinersiaqartunuinnaq ukiumut pitsannguutissatut
Naalakkersuisunit 2024-mi januaarip aallaqqaataanit neriorsuutaasimagaluartut,
assigiinngitsunik utoqqalinersiaqartinneqartut atugaat allannguinermi maanna
ajorseriartinneqarput.
