Utoqqatserfigineqarusupput
Juliane Henningsen (IA) 1950-ikkunni meeqqat misiligummik aallartitaanerat pisortatigoortumik utoqqatserfigineqarnissaa annaasaannillu taarsiiffigineqarnissaat kissaatigaa.
Juliane Henningsenip paragraf 20 atorlugu Folketingemut apeqquteqaammini Danmarkip naalagaaffia sinnerlugu statsministeri piumaffigaa pisortatigoortumik utoqqatsissuteqaqqillugu kiisalu meeqqat pineqartut ilaqutaasalu annaasaannut taarsiiffigineqarnissaat ilanngulluppai. Meeqqat 1950-ikkunni qallunaanngorsaanerup nalaani ilaquttaminnit peersinneqarput Danmarkimi ilaat meerarsianngortinneqarlutik ilaallu meeqqat angerlarsimaffiannut inissinneqarlutik.
- Meeqqat ilaquttaminnut attaveqanngillat kalaallisullu oqaloqqusaanatik inuiaqatigiinnullu kalaallinut attaveerupput, tamatumalu kingunerisaanik kulturikkut, oqaatsitigut kinaassutsikkullu allanngorneq meeqqat annaasaqaatigaat, folketingemut inatsisartunullu ilaasortaq Juliane Henningsen paragraf 20-imik apeqquteqaatini tunngavilersorpaa.
Folketingemi ilaasortaq isumaqarpoq meeqqat "misiligummi" peqataatinneqartut tarnikkut ikilerneqartut.
"Misiligut" meeqqat ilaquttat inuiaqatigiillu kalaallit tarnimikkut ikilerneqaatigaat kingupoloqaqaarlu. Apeqquteqartup inuit tamakku sinnerlugit paaserusuppaa statsministerip pilersaarutigineraa pisortatigoortumik utoqqatsertoqarnissaa inuit pineqartut annaasaannut erloqissutaannullu taarsiiffiginnittoqassanersoq, Juliane Henningsenip danskit naalakkersuisuinut paragraf 20-mi ilaatigut taama aperaaq.