Uulia sinnaasaataassava?

Nunarsuarmi uulia atorfissaqartinneqaqaaq Kalaallillu Nunaata pigaa. Niuernikkut atorneqarsinnaanersoq suli ilisimaneqanngilaq. Uuliali aqqutigalugu iseritassat namminersulernissamik takortuugaqarnermik piviusunngortitsisinnaapput. Apeqqutaalerpoq uuliamik isertitat qanoq ililluta inuiaqatigiinni siuariartornermut atussanerigut sinnaassaatiginagillu.

Ukiut tamaasa Kalaallit Nunaat qallunaat naalagaaffianit inummut ataatsimut agguaqatigiissillugu 12.000 US dollarsinit amerlanerusunik taperneqartarpoq. Isornartorsiuisut isumaqarput taamatut Danmarkimit tapiissutit inuiaqatigiinnik tapiissutaannarnik inuussuteqartunik pilersitsisimasut, taamaalillunilu iliuuseqartoqarusunnanilu nutaaliortoqarusunnani. Aamma isornartorsiuisut taakku ernummatigaat uuliatigut isertitat taamatut inissisimanermik sakkutusaataaginnassasut.

Taamaattumik maannakkut Kalaallit Nunaanni uuliaqarneranik misissuinerit inerneri pitsaanerpaat tassaanngilaq Skotlandimiut suliffeqarfiutaata Cairn Energyp marullummik uuliarasaatumik nassaarnera, 2011-mi Kalaallit Nunaata kitaani qillerinermi tusagassiuutinit alaatsinaanneqaqisoq. Tassaavorli Kalaallit Nunaata siunissaa pillugu uuliap inuiaqatigiinni tamani oqallisaanera.

Aningaasat uuliamit pisut qularnanngitsumik kalaallit inuussutigisussaassavaat. Sunali inuunermi pingaartissavarput? Anguniagaappat uulia aqqutigalugu inuiaqatigiit pitsaanerusut pilersinnissaat, taava Kalaallit Nunaanni eqqartortariaqaparput inuiaqatigiit qanoq ittut pilersikkusunnerlugit. Uulia aqqutigalugu isertitaqapiloornissaq tassaalertariaqanngilaq nunap piinik atuipilunnissaq, inuusuttut ilinniarnissaminnik pisariaqarsorinngitsut imaluunniit isumaginninnikkut naligiinnginnerulerneq, nunarsuarmimi allami arlalissuarni taama pisoqarsimavoq. Eqqortunik aalajangiinikkut qulakkeertariaqarparput uuliamit aningaasarpassuit tassaassasut kalaallit qaffasissumik pitsaassuseqartumik inuiaqatigiinngornissaannut aqqutissat.