Uuliasiorneq piumasaqaatinik annertuunik nassataqartarpoq
Naak uuliasiornermi suliassat Namminersorlutik oqartussaniikkaluartut kommuninut piumasaqaatit annertupput
Qaasuitsup Kommuniani kommunalbestyrelsermiut Aasianni talittarfimmi pisuttuartussanngorput. Tamaani pilersaarusiat, upalungaarsimanerit, avatagiisit, kommunillu uuliasiornerup nalaani suliassai suunersut paasititsiniutigineqassallutik. Tassa uuliasiornermi kommuninut piumasaqaatit annertunerisa kommunalbestyrelsermiut taamatut naapinnissartik pisariaqartilersimavaat. Uuliasiornermi siorna aallartimmat Aasianni pisorpassuaqarsimavoq, ukiorlu manna pisussat ikileriarnissaat naatsersuutigineqanngilaq.
- Uuliasiornermi akisussaasut tassaapput Namminersorlutik Oqartussat Aatsitassarsiornemilu Qullersaqarfik. Taamaattorli uuliasiornerup nalaani pisut kommuninut annertuunik aamma piumasaqaateqarput. Taamaammat Aasianni kommunalbestyrelsi junip 7-ni ataatsimiilerpata uuliasiorneq pillugu paasititsiniaaffigineqassapput, taama Qaasuitsup Kommunia tusagassiutinut nalunaarusiaanni allassimavoq.
Politikerinut suliniut Offshore Onshore (Imaani Nunamilu) ilisaritinneqassaaq, tassaallutillu uuliasiornerup nalaani kommunip nunami suliffeqarfinnik pilersitsinissanut suliniutai pitsaasut. Aamma uuliasiornermut atatillugu kommunip upalungaarsimanermut suliniutai sumut killinnersut paasititsiniutigineqassaaq. Tamatuma saniatigut iluaqutaasinnaasunik sunniutissat isumaqatigiissusiorneri - impact benefit agreements (IBA), inuiaqatigiinni piujuaannarsinnaanermut naliliinerit (VSB) kiisalu avatagiisinut sunniutaasinnaanernut naliliinerit (VVM) kommunalbestyrelsermiunut saqqummiunneqassapput.