Uumassusillit sananeqaataasigut kingornuttagaasunik isumalluutit misissornissaat nittartakkap nutaap ajornannginnerulersissavaa

Uumassusillit sananeqaataasigut kingornuttagaasunik isumalluutit pillugit paasissutissat atorneqarsinnaasullu ilisimatusartunut, ilinniarfeqarfinnut aamma Kalaallit Nunaanni uumassusillit sananeqaataasigut kingornuttagaasunik isumalluutinik misissuinissamut soqutiginnittunut angusaq pingaaruteqarpoq.

Uumassusillit sananeqaataasigut kingornuttagaasunik isumalluutit inuussutissarsiornikkut ilippanaateqarluarput, taavalu ilisimatusarnerit inernerillu inuussutissarsiutinut assigiinngitsorpassuarnut attuumassuteqarlutik. Ilisimatusaqatigiinnut 100-sunut akuersissutit 100-nik sinneqartut 2023-mi tunniunneqarput.

GovGen.gl sakkussaavoq annertooq, ilisimatusartunut soqutiginnittunullu paasissutissanik inatsisinik atuuttunik, qinnuteqarnermut tunngasunik nalunaaruteqarnissamullu piumasaqaatit pillugit paasissutissanik nassaarfiusinnaasoq. Tamatuma saniatigut atuisut siusinnerusukkut misissuisimanerit, sammisaat sumiinnerilu misissorsinnaavaat.

Ilisimasanik avitseqatigiinneq qulakkiissagaa

Ilisimatusartut ilisimatusarfiillu uumassusillit sananeqaataasigut kingornuttagaasunik isumalluutinik ilisimatusarnermi atuinissamut pisussaaffiat pingaarutilik tassaavoq, suliaminnit saqqummersitanik tamanik Naalakkersuisunut ilisimatitsinissaat.

Paasissutissat taakkua nunatsinni najugaqartunut, ilisimatuunullu annerusumik iluaqutissanngorlugit siunissami nittartakkamut ilanngunneqartalissapput.

Suliniut niuernissamik aallaaveqartumik ineriartortinneqassappat, iluanaarutit avinneqarnissaannik isumaqatigiissutissaq Kalaallit Nunaanni Namminersorlutik Oqartussat, illuatungerisallu akornanni suliarineqartarpoq. Iluanaarutit avinneqarnissaat aningaasat avinneqarnissaannik tunngassuteqarsinnaasarpoq, aammali aningaasanut tunngassuteqarani assersuutigalugu inuussutissarsiutit, suliffeqarfiit il.il. akornanni ilisimasanik annertusisamik avitseqatigiittoqarnissaanik tunngassuteqarsinnaalluni.

Ilisimatusarneq pillugu periusissap ilagigaa

Nunanut Allanut, Inuussutissarsiornermut Niuernermullu Naalakkersuisoq, Vivian Motzfeldtip, nittartakkap nutaap saqqummersinneqarnera nuannaarutigaa, taassumalu pitsaasumik sunniuteqarsinnaanera oqaatigalugu:

- Ilisimatusartut tamarmik ingerlataminnut akuersissuteqarnissaat qulakkeersinnaalerlutigu misissugassanik katersinissaq, qinnuteqartarnerlu pillugit paasissutissanik ilisimatuut, soqutigisaqaqatigiillu allat ajornannginnerusumik ujartuisinnaanngornissaat, ilisimatusarnermilu paasisat nunatsinni innuttaasunit takuneqarsinnaanerulernissaat qilanaaraara. Ilisimasalikkat najukkami inuussutissarsiutillit atorsinnaaniassammatigit, nutaamillu eqqarsarnissamik inuusuttut isumassarsitinneqarniassammata ilisimalikkat atorluarnerunissaat pingaaruteqarpoq

Naalakkersuisut Ilisimatusarnermut periusissiaat, tassani pingaarnertut ukkatarisat sisamaasut ilagisaat ilisimatusarnerit inerneri tamanit pissarsiariuminartuunissaat naapertorlugu nittartagaq atulersinneqarpoq. Akuersissutinik tunniussisarneq, nalunaarutillu tiguneqartarneri ilutigalugit nittartagaq ataavartumik nutarterneqartassaaq.