Uumasunik illersuiniaqatigiit ajugaasuupput
Kalaallit Nunaanni Canadamilu EU-p puisit amiinik tuniniaaqqusiunnaarnera pillugu aalassanneq uumasunut illersuiniaqatigiinnut iluaqutaavoq.
Uumasunik illersuiniaqatigiit EU-mi puisit amiisa inerteqqutigineqalernerat nuannaarutigeqaat, tassami tamanna pissutaalluni suliniaqatigiiffiit nutaarpassuarnik ilaasortaqalerput aammalu aningaasaateqarnerulerlutik. Amerlasuullu isumaqarput uumasunik illersuiniaqatigiiffiit tamanna inerteqqut, piniartut qangaluunniit piniarnermikkut angusinnaanngilluinnarisimasaannut, amerlanerparujussuarnik aningaasanik pissarsissutigigaat.
Canadami naalakkersuisut piareersimapput 50 millionit koruunit nalingi atussallugit EU-p eqqartuussisulersuuneqarnissaanut. KNR taamatut allaaserisaqarpoq, nangillunilu:
– EU-p puisit amiinik tunisassianik inerteqquteqalerneranut tunngatilugu Canadamit iliorneq sakkortuvoq pilertorlunilu. Canadami naalakkersuisut nunarsuarmi niueqatigiinnermi suleqatigiiffimmut WTO-mut aalajangerneq ingerlateqqinniarpaat. Tamanna ukiut arlallit ingerlanneqassaaq akisullunilu. Kisianni naalakkersuisut isumaqarput, tamatumunnga aningaasanik atuinissaq imminut akilersinnaasasoq, naak eqqartuussisutigut ingerlatsineq 50 millionit koruunik pallillugit akeqassagaluartoq naallu maannakkut puisinniarnermi aningaasat isertitarineqartartut taamaallaat ukiumut 5 millioni koruunit missaannaaniikkaluartut. Ukiuni kingullerni puisip amiata ataatsip akia 500 koruuniniit 60 koruunit missaannut apparsimavoq.
Taamaattumik eqqartuussisutigut ingerlatsineq Canada puisit amiinik niuernermigut isertitarisartagaaniit akisunerusussanngortutut isikkoqarpoq.