Uummannami angallataatilinnut pisassiissutit nungunneqarput
Uummannami angallataatilinnut pisassiissutit nungunneqarput. Aalisarnermullu Naalakkersuisoqarfimmit maanna eqqaasissutigineqarpoq, angallatit niiverutigineqarsinnaasunik pisassallit (IOK) aqutsiveqarfinni allani suli aalisarsinnaasut.
Uummannami qaleralinniarneq ingerlalluarpoq.
Ima ingerlalluartigaaq allaat anginerusunik angallataatilinnut qaleralittassiissutit nungussimallutik, angallataatillilli amerlasuut niuerutigineqarsinnaasunik suli pisassaqarput.
Taamaammat Aalisarnermut Naalakkersuisoqarfimmit aalisartunut taakkununnga eqqaasississutigineqarpoq, angallatit pineqartut aqutsiveqarfik 47-mi suli aalisarsinnaasut. Aqutsiveqarfik 47-miipput Upernavik, Uummannaq Qeqertarsuullu Tunua.
- Taamaasilluni angallataatilik suli pisassalik, kisiannili pisassat pisassiiviit arlaanni nungussimappata, taava pisassiivinni allani marluusuni angallatip pisassaatini aqutsiveqarfimmi 47-qarfimmi arlaanni suli pisassaqarfiusumi aalisarsinnaavai, Aalisarnermut Piniarnermullu Naalakkersuisoqarfik tusagassiorfinnut nalunaaruteqarluni allappoq.
Aalisarnermut Piniarnermullu Naalakkersuisoqarfimmi pisortap Jørgen Isak Olsenipi ilisimatitsissutigaa, malittarisassaq malillugu angallataatillit pisassaminnik suli nunguutsisimanngitsut qaleralinniarnerisa ingerlaannarnissaat qulakkeerneqartoq.
- Angallat Uummannameersoq Upernaviup eqqaani aalisarpat, qalerallit pisarineqartut Uummannap aqutsiveqarfiani pisarineqarsimasutut nalunaarsorneqassapput. Tamatuma taamaammat aqutsiveqarfinni allani marluusuni angallatinut allanut pisassiissutit sunniuteqarfigissanngilai, Jørgen Isak Olsen ilisimatitsivoq.
Pisassiissutinik siumoortumik aalisarfissanngortoq
Aalisariutit 20221-mut pisassiissutiminnik nunguutsisimasut ukiup tullianut pisassiissutinik siumoortumik aalisarnissamut qinnuteqarsinnaapput, taamaalillutillu aalisarnertik ingerlatiinnarsinnaallugu. Angallataatilik aappaagumut pisassiissutissanik siumoorusuppat, qinnuteqarnissamut killiliunneqarsimavoq, ataasinngorneq novembarip 15-iat, Aalisarnermut Piniarnermullu Naalakkersuisoqarfimmit ilisimatitsissutigineqarpoq.
- Annertussuseq aaliangersimasoq ukiumut pisassaniit sipportumik aalisarsimagaanni ukiup tulliani pisassaniit ilanngaatigineqassaaq, naalakkersuisoqarfik allappoq.