Julehjælp
Uummataasaaqqat savaaqqap neqaanik siatartortitsipput
Juulliaqqami ualikkut Narsami innuttaasut illuanni A21-mi ukioq manna juullimi nerisitseqqittoqarpoq
Piumassutsiminnik aningaasarsiutiginagu suliniaqatigiit Uummataasaaqqat ukioq manna Narsami kiserliortunut, angajoqqaanut kisermaanut inunnullu pissakitsunut decembarip 24-anni juullimi nuannaartitseqqipput. Tamanna pivoq Narsami innuttaasut illuanni A21-mi.
Sassaalliutigineqarput puulukimineq siataq savaaqqallu neqaa siataq naatsiialerlugit, naatitalerlugit rødkålilerlugillu. Tamanna peqatigalugu juullimut koorit kingulliit agguaanneqarput. Taakku imaraat juullimi nerisassat, naatitat, mamakujuit, kiisalu iffiornissamut qajuusat makkariinalu. Tamakkua illoqarfimmi pisiniarfinnit, inuussutissarsiortunit inuinnarnillu tunniunneqarsimapput. Savaaqqap neqaa toqoraaviup Neqi a/s-ip tunissutigaa, meeeqqanullu juullimi tunissutit Polarmagasinet-ip tunissutigai.
Ukioq manna ilaqutariinnut 46-nut juullip kooriinik agguaassisoqarpoq, juulliaqqamilu A21-mi nereqataasut 40-t missarpiaanniipput.
Aaqqissuussineq iluatsilluartoq, tunissuteqarfigineqartullu nuannareqaat, pingaartumik meeqqat.