Uummatimikkut milittoornerit amerlanerujussuit
Uummatip nakorsaa nalunaarpoq napparsimasut uummatimikkut annertuumik ajuuteqarlutik Sanamut unitsinneqartartut amerleriarujussuarsimasut
Kalaallit Nunaanni inuit qassit uummatimikkut nappaateqarnersut eqqoqqissaartumik nalunaarsugaanngilaq. Annertuumilli amerleriarsimanerannut takussutissaqarluarpoq, aviisi AG allappoq.
Nakorsat peqatigiiffiata atuagassiaani Nakorsanut nutaami Dronning Ingridip peqqissaaviani uummatip nakorsaata Uka Wilhjelm Geislerip oqalugiaataa ilanngunneqarsimavoq; qaammammi kingullermi Nuummi Nunamedimi ataatsimeersuartitsimmat oqalugiaatigaa.
Sapaatip akunneranut marlussuit
Oqalugiaataa tusagassiuutini immikkut sammineqangaanngilaq, soqutiginarluinnartunilli maluginiagassaqqissunik imaqarpoq.
Ilaatigut ima oqarpoq:
- Dronning Ingridip peqqissaaviani nakorsaallunga inuusuttoq ukiumut inuit marluk pingasut uummatimikkut milittoortarput. Maannakkut Nuummi sinerissamilu illoqarfinni sapaatit akunneranut marlussuit takusarpavut.
Uka Wilhjelm Geisler naapertorlugu piffissap ingerlanerani ineriartorneq malunnarluarpoq. 1968-1985-imut nalunaarsuisimanerup takutippaa angutit naggueqatigiinnit inunnit kingoqqisuusut angutinit qallunaanit uummatimikkut milittoornissaminnut 50 procentimik ilimanaateqannginnerusut, arnanilu 30 procentimik appasinnerulluni.
Allaaserineqartoq aviisimi AG-mi, aqagu pingasunngornermi saqqummertussami, tamakkiisumik atuarneqarsinnaavoq. Aviisi uani pisiarineqarsinnaalereerpoq: