Visit Greenland nunat tamalaat nersornaasiuttagaannik nersornaaserneqartoq
Visit Greenland ”internetsikkut akissarsissutigineqartartumikannerpaamik” akissarsitinneqarsimavoq, tassa Amerikami Webby People’s Voice Award pissarsiarisimavaa. Visit Greenlandip taamaalilluni unammillertini CNN aamma Tourism New Zealand ajugaaffigai.
Videoliap imarivai Covid-19 aamma Visit Greenlandip nunattinni sulinngiffeqarnerup
nalaani angalanissamik periarfissat nittarsaaneqarneri. Taamatut nittarsaassinermi
videoliaq 3 minutsinik sivisussuseqartoq “Angalanerit misigisassallu” unammissutigineqartumut innersuunneqarsimavoq, taanna inuppassuarnit nunanit tamalaaneersunit toqqarneqartarsimavoq. Ukioq manna Webby Awardeqarnerani inuit 2 millioninit amerlanerusut taaseqataasimapput, Visit Greenland tusagassiorfinnut nalunaaruteqarluni ilisimatitsivoq.
- Assorujussuaq tulluusimaarpunga, ingammillu tulluusimarutigaara Visit Greenlandimi sulisoqaratta pikkorilluinnartunik. Taakku suliaq tamaat, oqaasertalersuineq videoliornerlu, suliarisimavaat, taamak oqarpoq Visit Greenlandip pisortaanera nuannaaqisoq tulluusimaartorlu Hjörtur Smarason, nangillunilu oqarluni:
Nassaarsiullaqqissuseqarneq
- Ajugaassutigineqartup takutippaa pitsaasumik oqaluttuassaqaraanni nassaarsiullaqqillunilu, taava unammisat aningaasaateqarnerujussuit taamaalillutillu periarfissakkaanerujussuit ajugaaffigineqarsinnaanerat. Siunissami takornariat suli amerlanerusut nunatsinnut kusarnartumut tikeraarsarniarutsigit una pisoq assut ilinniarfigissinnaavarput.
Kalaallit videoliaat ”Siunissaq tuniniarneqanngilaq” nunarsuarmit tamanit pingaartumillu USA-miit taaguunneqarsimavoq. Taasisimasut 1 procentiinnai nunatsinninngaanneersuusimapput. Video inuit internettskkut naapittarfiini tuusinterpassuariarluni takuneqarsimavoq, nunanilu tamalaani tusagassiorfinnit, soorlu New York Timesimit, BBC-mit aamma Washingotn Postimit arlaleriarluni allaaserineqarsimalluni.
Aamma atuaruk: Visit Greenland: Kusanartumik nersornaaserneqarnissatsinnut ikiortigut