Issittoq
Vittus Qujaukitsoq: EU-p Issittumut politikkia nutaaq alloriarneruvoq
Bruxelles Issittumi pingaarutilimmik inissisimavoq, kisianni tassani inunnik inuusunut iluaqutaanngitsumik politikkiliussanngillat, inuussutissarsiornermut, suliffeqarnermut, niuernermut nukissiuuteqarnermullu naalakkersuisoq isumaqarpoq
Naalagaaffiit Peqatigiit Issittumi ineriartortitsinissamut pingaarutilimmik inissisimavoq, kisianni Issittumi nunat inuiaalu oqaloqatigalugit tamanna pissaaq.
Inuussutissarsiornermut, suliffeqarnermut, niuernermut nukissiuuteqarnermullu naalakkersuisoq Vittus Qujaukitsoq (S), ippassaq Arctic Futures Symposiumimi Bruxellesimi peqataasunut 250-it missaaniittunut taama nalunaaruteqarpoq.
- Nunatta ilaani Naalagaaffiit Peqatigiit isiginninnerat isumaallu Kalaallit Nunaata akuersaarpaa. Kisianni - uagut Issittumi innuttaasut - avatangiisivut illersorlugillu aquppagut, taamatullu piujuaannartitsisumik nunap ilaa qanoq sukkatigisumik ineriartortinneqassanersoq aalajangissavarput, Vittus Qujaukitsoq ataatsimiinnerup ammaanersiorneqarnerani oqarpoq.
Aningaasaqarneq ineriartornerlu
Tamanna Arctic Futures Symposium ukiut arfineq-aappassaannik ingerlanneqarpoq, tassani Issittumi susassaqartut Bruxellesimi katersuutsinneqartarput.
Ukiut siulliit silap pissusaa, avatangiisit aamma politikki kisimik aallutarineqartaraluartut, ukiuni kingullerni ataatsimiinneq aningaasaqarnermut ineriartortitsinermullu tunngalernikuuvoq.
Pimoorussineq nukittorsarneqartoq
Tamannalu Europami kommissionip Issittumut politikkiani, apriilimi akuerineqartumi ersersinneqarpoq. Kommissioni naapertorlugu suliniutaareersut aamma pimoorussineq annertusarneqarnissaa politikkiuvoq, kisianni piujuaannartitsisumik aamma nunanik tamalaanik suleqateqarneq sammineqarnerussalluni.
Politikki aamma Issittumi susassaqartut EU-p nunap ilaani suliniuteqarfigisaani ilanngunneqarsinnaanissaa ataatsimiinnermi sammisat annersaasa ilagaat.
Vittu suleqatigiinnissamik piumasaqarpoq
Naalagaaffeqatigiit Peqatigiit Issittumi nunanut ataqateqarnerani politikki siumut alloriarnerusoq oqaatigaa, naak Bruxellesip ingammik Nuummut attaveqarnera akeroqaraluartoq isertuutinngikkaluarlugu.
- Nunat aamma Europami NGO-t ilaat ersarissumik Issittumi innuttaasunik nunanilluunniit pisinnaatitaqaratik politikkiliorsinnaallutik isumaqarnerat akuersaarneqarsinnaanngilaq - ingammik Issittumi avatangiisit illersornissaat siunertaatillugu, Vittus Qujaukitsoq oqarpoq.
EU allatigut Kalaallit Nunaanni pingaarutilimmik inissisimavoq, soorlu ilinniartitaanermi. Kisianni naalakkersuisuisoq naapertorlugu aatsitassarsiorneq, nassiussanik imaatigut angallassineq, imeqarneq aamma ilisimatusarneq annertunerusumik suleqatigiissutigalugit Kalaallit Nunaata Europallu iluaqutigisinnaavaat.