Vivian Motzfeldt (S): Periusissiap siunissamut ungasinnerusumut suleqatigiissutissat eqqanaassavai

Nunat tamat oqartussaaqatigiinnerannik aallaavillit tamarmik namminerisamik imminnut ingerlakkusuttuupput, taamaattorli arlaannaalluunniit imminnut pinngitsoorsinnaanngillat, taamaammallu nassaareqatigiinnissaq, nammineernermik innarliinngitsoq avaqqunneqarsinnaanngilaq, nunatut suleqatigiittut imminnut nangittumik taasinnaassagunik.

Maannalu Kalaallit Nunaat nunanut allanut, sillimaniarnermut illersornissamullu qanoq ittumik inerisaarusunnerluni nalunaatsumik nalunaaruteqarpoq.

Naalagaaffinnngornissamut nunanullu allanut Naalakkersuisoq, Vivian Motzfeldt (S) naammagisimaarinnippoq nunatsinni partiit tamangajalluinnarmik akisussaaqataanermik takutitsillutik nunatta politikkikkut anguniagassai pillugit ilusilersueqataasimammata:

- Nunami demokratiskiusumi pissutsit taamaapput, takorusunnarsimagaluarpoq Inatsisartuni partiit tamarmik periusissiaq una katersuuffigisinnaassagaat, taamaattorli partii ataaseq periusissiassatut suliarineqartumi peqataasutut imminut takusinnaasimanngilaq, tamannalu ataqqisariaqarparput.

- Taamaattorli partiinit tallimaasunit sisamat, aammalu siammasissorujussuarmik aallaavillit tamarmik peqataajumasimapput nunatta nunanut allanut, sillimaniarnermut illersornissamullu periusissiassaq akisussaaqataaffigerusullugu, tamannalu assut naammagisimaarnarpoq, misigisimavungalu nukittuumik patajaatsumillu tunngavisseeqatigiinnerusoq, Vivian Motzfeldt nassuiaavoq.

Danmark nunallu allat qanimut suleqatigisat tusarniaaffigineqarput

Isertugaanngilaq naalagaaffik tassaammat nunanut allanut, sillimaniarnermut illersornissamullu aningaasartuutit amerlanersaannik matussusiisartoq, taamatuttaaq naalagaaffiup isumagisarigaa issittumi nunap killeqarfiisa iluini oqartussaassuseqarnerup innarligassaannginnera qulakkeerniarlugu alapernaarsuinermik ingerlatsineq.

Suliassaqarfiit annertunerujartortumik nunatsinnit ingerlanneqarnissaannut atatillugu aamma aningaasatigut nammatassat annertusiartortut nunatta nammineq isumagisassariartuaalissagai naatsorsuutigineqartariaqarpoq, aamma politikkikkut anguniakkat pitsaanerpaamik anguneqarnissaat qulakkeerniarlugu inuit sulisinneqartussatut isumalluutit ilanngullugit, tamannali Kalaallit Nunatta innuttaqassutsimigut aningaasallu kaaviiartinneqartartut ikittuinnaat isumalluutissaralugit nunaarannguartut isigineqartariaqartup akissaqartippaa?

- Siullertut erseqqissaatigissavara una periusissiaq tassaavoq nunatsinni innuttaasut namminneerlutik periusissiaat, taamaattorli aamma erseqqissaatigissavara soorunami nunat suleqatigut ataqqilluinnaratsigit, pingaartumik USA, Canada aamma Island minnerunngitsumillu Danmarki, taamaammat aamma periusissiap suliarineqarnerani tusarniaaffigineqarput, tassami suleqatigiinneq ataqqeqatigiiffiusoq angorusukkutsigu, taava aamma pingaaruteqarpoq periusissiamik taamak pingaaruteqartigisumik suliaqarnitsinni qanoq isumaqarnersut tusarniaaffigissallugit, Vivian Motzfeldt Sermitsiaq.AG-mut erseqqissaavoq.

Nunamik ataasiinnarmik aningaasarsiornikkut pinngitsuuisinnaannginneq aqqutissaanngilaq

Kalaallit Nunaat aningaasarsiornikkut aaqqissuussaanikkullu ukiuni hundredelikkaani arlalinni Danmarkimik pinngitsuuisinnaasimanngilaq.

Naalagaaffinngornissamut nunanullu allanut Naalakkersuisoq, Vivian Motzfeldt isumaqarpoq piffissanngortoq pinngitsuuisinnaannginneq taanna qaangerniarlugu alloriaqqittoqartariaqartoq, tamannalu pisinnaasoq suleqatigiinneq piusoq innarlinngikkaluarlugu:

- Ukiorpassuarni aningaasarsiornikkut, niuernikkut aammalu nunanut allanut, sillimaniarnermut illersornissamullu atatillugu nuna ataaseq pinngitsoorsinnaanngitsutut inissisimaffigiuarsimavarput. Takusinnaalernikuuarpullu taamatut pituttorsimanerput ineriartornermik kissaatigisatsinnik pilersitsiviunngitsoq aammalu aningaasarsiornikkut nammineernerulernissatsinnut aqqutissiiuussisuunngitsoq.

- Taamaammat piffissanngorpoq periarfissanik allanik suleqatigeeriaatsinillu allaanerusunik ujartuinissarput, taamaaliornikkut nunatta nunamut ataatsimut pinngitsuuisinnaannginnera mumisillugu politikkikkut aningaasarsiornikkullu nammineernerulluni inississinnaanera aqqutissiuussinnaagatsigu, taamaattumik isertugaanngilaq nunat qanimut suleqatigisagut suli angusaqarfiunerusumik suleqatigilernissaat kissaataammat nunatta tungaaniit, taakkulu pingaartumik tassaapput nunat toqqaannartumik sanilerisagut, USA, Canada aamma Island.

Taavami Danmarkip Kalaallit Nunaat iperarusulissappagu susoqassava?

Kalaallit Nunaanni innuttaasut politikkikkullu suliaqartut akornanni ersersinneqartuartarpoq ilumut aamma pimoorullugu nunarput politikkikkut aningaasarsiornikkullu namminerisamik ingerlalissasoq, aammalu tamanna anguniarlugu sulissutiginninneq ingerlanneqassasoq aqqutissiuunneqarluni. Apeqqullu isumaannarsuutaassagunaraluartoq, Motzfeldt qinnuigaarput isummeqqullugu qanoq pisoqassanersoq Danmarkip toqqassappagu Kalaallit Nunaat namminiilerusummat ipernaannassallugu:

- Isumaqarpunga apeqqut tassunga sammitissanngikkipput, ullumikkummi suleqatiiginnerput pitsaasoq aallaavigerusunneruara, aamma matumani erseqqissaatigissavara sillimaniarnermut illersornissamullu isumaqatigiinniarnigut assut pitsaammata ataqqeqatigiinnermillu aallaaveqarlutik. Danmarkimit naluneqanngilaq nunarput qanoq kissaateqarnersoq, aamma Danmarkip nalunngilaa aningaasarsiornikkut nammineq allanillu isumalluuteqarata ingerlanissatsinnik kissaateqartugut, ilumullu aningaasarsiornikkut imminut napatissagutta taava allannguisariaqarpugut, tassami qanorluunniit pisoqaraluarpat, Kalaallit Nunarput Danmarkilu suleqatigiittuartussaapput. Ukiorpassuimmi suleqatigiippugut, maannali piumasaraarput naligiinnerusumik suleqatigiissalluta, naalagaaffinngornissamut nunanullu allanut Naalakkersuisoq, Vivian Motzfeldt naggataatigut erseqqissaavoq.