VM-imut isiginnaariarnermi aningaasat ima amerlatigisut Mimi Karlsenip atorpai
Inatsisartut siulittaasuata Mimi Karlsenip Norgemi Stavangerimi arnat nunanut allanut unammisartut VM-imi unamminerat novembarimi/decembarimi isiginnaariartorlugu Namminersorlutik Oqartussat aningaasaataat 27.000 koruunit sinnerlugit atorpai.
Inatsisartut siulittaasuata Mimi Karlsenip Kalaallit Nunaanni Timersoqatigiit Kattuffiannik illersuisutut 7.177,88 koruunit akunnittarfimmut ullormullu aningaasarsiassanut atorsimavai, 20.166 koruunillu timmisartornermut aningaasartuutigisimallugit.
Sermitsiaq.AG-p allagaatinik takunnikkumaneranut atatillugu tamanna Inatsisartut pisortaata tulliata Elly Hauge Pedersenip akissuteqaataani atuarneqarsinnaavoq.
Illersuisoq
Mimi Karlsenip Stavangerimut angalasinnaaneranut pissutaasoq aamma akissummi allassimavoq, illersuisutullu inissisimaffia innersuussutigineqarpoq.
- Kalaallit Nunaanni Timersoqatigiit Kattuffiata malittarisassaani allassimavoq Inatsisartut siulittaasuat timersoqatigiit kattuffiannut illersuisuusoq. Inatsisartut siulittaasui atorfimmut qinigaasinnaanermut ataatsimiititaliamit akuersissummik pissarsisarput. Akuersissutigineqarsimavorlu, Elly Hauge Pedersen ilisimatitsivoq.
Siusinnerusukkut paragraf 37 naapertorlugu apeqquteqaat naapertorlugu akissummi ilisimatitsissutigineqarpoq Naalakkersuisut pingasut, atorfilittat tallimat ministerillu allattaa ataatsip VM-ertoqarnerani peqataanerat Namminersorlutik Oqartussanut 210.677,09 koruuninik akeqartoq.
Mimi Karlsenip ilanngussaa ilanngullugu VM-imi unamminerit akileraartartunut 238.020,97 koruuninik akeqarsimapput.
Kisimiilluni angalasoq
Mimi Karlsen kisimiilluni atorfilittat ilaginagit novembarip 27-aniit decembarip sisamaanut angalasoq aamma ilisimatitsissutaavoq.
Frederikshavnimi ingerlanneqartumi Kalaallit Nunaata inissinniunnerani Inatsisartut siulittaasuat najuutinngilaq.
