Vuf vuf: Nunarsuaq tamakkerlugu qimmit ulluat
Arfininngorneq 26. august inuup ikinngutiginerpaasaa, qimmeq, nunarsuaq tamakkerlugu nalliuttorsiutigineqarpoq.
Kalaallit Nunatsinni qimmit sulisartut suliassaqarfinni simaniipput; qimmit qimuttut, politiit qimmii, ilanngaaserisut qimmii aammalu qimmit napparsimasunut ikiuisartut. Taakku saniatigut qimmit assigiinngitsorpassuit inunnik ilaqutaqarlutik uumasuutigineqarput inuttaminnit asaneqaqisut pinngitsoorneqarsinnaanngitsullu.
2004-mili nunarsuaq tamakkerlugu qimmeq ulloqartitsisoqartalernikuuvoq 26. augustimi pisartumik, taamaammat pissutissaqarluarpoq ilimagissallugu saanikut mamarunarnersiukkanik qimmit kikkagassannakkumaartut ullumikkut.
Kalaallit Nunaanni politiit suleqatitik qimmit nalliuttorsiutigivaat uanilu qimmeq immikkuullarissumik pikkorissusilik, Chase inummik Uummannap eqqaani annaassisimasoq pillugu oqaluttuarput:
Chasep suleqataa, Jens Thorin oqaluttuarpoq:
- Chaseqarsimanngikkaluarpat arnaq taamak sukkatigisumik nassaarisimanavianngikkaluarparput – arnallu uumaannarnissaanut piffissaq pingaaruteqarluinnarpoq. Ulloq taanna inummik annaassivoq.
Sinnera politiit facebookikkut nittartagaanni uani atuarsinnaavat:
Qimmit qimuttut Nunatsinneersut ikiliartortut
Qaasuitsup avannaatutaangiipput qimmit qimuttut 15.000-it missaannik amerlassusillit. Ukiut qulikkaat ataasiinnaat kingumut qiviarutta qimmit qimuttut taakku immikkuullareqisut marloriaataanik amerlassuseqarnikuusimapput. Ikiliartulersimanerat iliuuseqarfiginiarlugu "qimmit qimuttut pillugit periusissiaq" suliarineqarluni aallartinneqarnikuuvoq qulakkeerniarneqarluni siunissami qimmip taassuma piuinnarnissaa.
Inatsisartummi upernaakkut 2022-mi aalajangernikuupput Naalakkersuisut peqquneqassasut periusissiamik qimminut qimuttunut tunngasumik suliaqassasut.
Piffissaq kingulliunerusoq qissimikkutsigu, qanittumi atorfinitsitsisoqarpoq qimmit qimuttut nakorsassaannik Ilulissani najugaqartussamik, soorluuna aamma tassuuna ilimasulluartoqarsinnaasoq qimmit qimuttut taakku piginnitsiminnit pinngitsoorneqarsinnaanngitsut annertusisamik eqqumaffigineqarnissaat.
